Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 78 Hüküm no: 45 Orijinal metin no: [9a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer b. Şaban’ın vârislerinden kızı İsmihân’ın babasına ödünç verdiği paranın bir kısmını kardeşlerinin vasîsinden tahsil edip kalanından ferâğat ettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Kiremitçi Süleyman Çelebi binâ eylediği mescid-i şerîfde müezzin olup bundan akdem vefât eden Ömer b. Şaban nâm kimesnenin verâseti zevce-i metrûkesi Fâtıma bt. İbrahim nâm hâtuna ve sulbiye kebîre kızı İsmihân ile sulbiye sagīre kızı Âişe’ye ve sulbî oğlu Ahmed nâm sagīre münhasıra olduğu şer‘an zâhir oldukdan sonra merkūme İsmihân meclis-i şer‘-i şerîf-i lâzımü’t-tevkīrde işbu râfi‘ayi’l-kitâb sagīrân-ı mezbûrân Ahmed ve Âişe’nin kıbel-i şer‘-i şerîfden mansûb vasîleri olan Hasan Halîfe b. İbrahim nâm kimesne mahzarında bi tav‘ihâ ikrâr ve i‘tirâf edip babam müteveffâ-yı mezbûr Ömer zimmetinde cihet-i deyn-i şer‘îden dört bin akçe hakkım olup hâlen meblağ-ı mezbûrun iki bin sekiz yüz akçesini vasiyy-i mezbûr Hasan Halîfe yedinden bi’t-tamâm ve’l-kemâl ahz ü kabz eylediğimden sonra mâ‘adâ bin iki yüz akçe da‘vâsından sagīrân-ı mezbûrânın zimmetlerini ibrâ ve iskāt eyledim dedikde mukırra-i mezbûrenin minvâl-i muharrer üzre cârî ve sâdır olan ikrârını vasiyy-i mezbûr Hasan Halîfe vicâhen ve şifâhen tasdîk ve tahkīk etmeğin mâ vaka‘a bi’l-ibtigā ketb olundu. Fî evâsıtı Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Fahrü’ş-şüyûh Şaban Efendi b. Yahya Efendi, eş-Şeyh Hasan Efendi b. Mustafa, Ali Çelebi b. Hasan el-İmâm, Şaban Efendi b. Kenan, Hüseyin Dede b. Şaban, Mustafa Çelebi b. Bayram ve gayruhüm