Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 79 Hüküm no: 46 Orijinal metin no: [9a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Vasilaki’nin mülk menzilini Hırsando v. Todori’ye sattığı Vilâyet-i Rumeli’nde livâ-i Mora’da Kalavrite kazâsına tâbi‘ Sobotos nâm karye sâkinlerinden Todori v. Vasilaki nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Hırasando v. Todori nâm zimmî muvâcehesinde bi’t-tav‘ ve’r-rızâ ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafdan Peraskolo mülkü ve bir tarafdan Petrakolo mülkü ve bir tarafdan Vasiliko mülkü ve bir tarafdan tarîk-i âm ile mahdûd bir bâb fevkānî oda ve altında ahırı ve zât-ı eşcâr-ı müsmire ve gayr-ı müsmire bahçeyi ve havluyu müştemil mülk menzilimi cemî‘ tevâbi‘ ve levâhıkı ile merkūm Hırasando’ya elli kıt‘a riyâlî kebîr guruşa bey‘-i bâtt-ı kat‘î ile bey‘ edip ol dahi vech-i meşrûh üzre iştirâ ve kabûl eyleyip semeni olan merkūmü’l-vasf elli guruşu mersûm Hırsando yedinden bi’t-tamâm ve’l-kemâl ahz ü kabz eylediğimden sonra mebî‘-i mahdûd-ı mezkûru mahallinde zabt ve tasarrufa mezbûr Hırsando’yu tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ aşer min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali b. Mustafa, Abdullah Beşe b. İskender, Hüseyin Çelebi b. Ali, Dilâver b. Abdullah ve gayruhüm mine’l-hâzırîn Kınlı Panayot, Yani, Andriye, Nikola, Todori, Andriye, Yani, Panayot, Yani, İstemad, Dimo, Yani, Andriye, Panayot, Yani, Petro, Dimo, Yani, Dimo, İstati, Panayot