Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 80 Hüküm no: 48 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed’in oğulları Mehmed ile Receb’in ortak mülk menzillerini Emine Hâtun bt. Hızır’a sattıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Bıçakçı Ferhad mahallesi sâkinlerinden Mehmed ve Receb ibney Ahmed nâm kimesneler meclis-i şer‘-i şerîf-i lâzımü’t-teşrîfde işbu hâmiletü’l-vesîka Emine Hâtun bt. Hızır muvâcehesinde her biri ikrâr ve i‘tirâf edip ber vech-i iştirâk mülkümüz olup mahalle-i mezbûrede vâki‘ cevânib-i erba‘ası İbrahim Beşe b. Abdülbâkī ve Sekrî Mehmed b. Ahmed ve Hatice Hâtun bt. Mahmud mülkleri ve tarîk-i âm ile mahdûd iki bâb tahtânî odaları ve bir sofayı ve bir su kuyusunu ve zât-ı eşcâr-ı müsmire ve gayr-ı müsmire hadîkayı ve kenîfi müştemil mülk-i müşterek menzilimizi cümle tevâbi‘ ve levâhıkı ile merkūme Emine Hâtun’a bey‘-i kat‘î ile on dokuz bin cedîd akçeye bâtten bey‘ ve teslîm eylediğimizde ol dahi minvâl-i mübeyyen üzre iştirâ ve tesellüm ve kabûl ve kabz eyledikden sonra semen-i mezbûrun on bin beş yüz akçesini yedinden ahz ü kabz eyleyip semen-i bâkī sekiz bin beş yüz akçesini târih-i kitâbdan doksan gün tamâmına değin te’cîl eyledik, ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye bizim alâka ve medhalimiz yokdur merkūme Emine Hâtun’un mülk-i müşterâsı olmuşdur keyfemâ teşâ ve hasbemâ tehtâ[r] mutasarrıfa olsun dediklerinde mukırrân-ı merkūmânın minvâl-i meşrûh üzre cârî ve sâdır olan ikrârını merkūme Emine Hâtun bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâdî aşer min Şa‘bâni’l-mükerrem li sene hamsin ve sittîn ve elf. Şuhûdü’l-hâl: Ahmed Ağa b. Mehmed, Mehmed Çelebi b. el-Hâc Mehmed, Beşir Çelebi b. Ahmed, Hasan Beşe b. Abdullah, Ali Beşe b. Mustafa ve gayruhüm mine’l-hâzırîn