Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 81 Hüküm no: 49 Orijinal metin no: [9b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mumcuların işledikleri mumu eskiden olduğu gibi sadece bakkallara satacakları; attârlara satmamak üzere anlaştıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de pazarbaşı olan işbu bâ‘isü’l-kitâb Mehmed Beşe b. Abdülbâkī nâm kimesne meclis-i şer‘-i şerîf-i lâzımü’t-tevkīrde yine medîne-i merkūmede mumcu tâ’ifesinden Argiri v. İstati ve Yani v. Armağan ve Apostol v. Papa ve Rizo v. Avyuri ve Sina v. Argiri ve Siro v. Papa nâm zimmîler muvâcehelerinde üzerlerine da‘vâ ve takrîr-i kelâm edip kadîmü’l-eyyâmdan medîne-i mezbûrede olan tâ’ife-i bakkalân mezbûrûn zimmîlerin işledikleri mumlarını iştirâ ve kendi dükkânlarında bey‘ edip tâ’ife-i mezbûreden gayrı kimesneye bey‘ edegelmiş değiller iken hâlen mezbûrûn zimmîler hilâf-ı kānûn ve kadîm attâr tâ’ifesine işledikleri mumu bey‘ edip nizâ‘dan hâlî değillerdir suâl olunup ikrârları tahrîr olunmak matlûbumdur dedikde gıbbe’s-suâl mezbûrûn zimmîler cevâblarında fi’l-vâki‘ kadîmü’l-eyyâmdan işlediğimiz mumu bakkal tâ’ifesine bey‘ edegelmişizdir deyû her biri mukır ve mu‘terif olmağın mûcebiyle min ba‘d işledikleri mumu bakkal tâ’ifesinden gayrı attâr tâ’ifesine vermemeğe beynlerinde kavl ve ta‘ahhüd eylediklerinde mâ hüve’l-vâki‘ bi’l-ibtigā ketb olundu. Fi’l-yevmi’s-sânî aşer min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali Beşe b. Mustafa, Hüseyin Beşe b. Ali, Ahmed Beşe b. Hasan, Mustafa Beşe çukadâr, Bayram Sofu b. Mehmed ve gayruhüm mine’l-hâzırîn