Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 82 Hüküm no: 51 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa Dimitri v. Miho’nun zeytin ağaçlarını bey‘ bi’l-vefâ yoluyla İstilo v. Yani’ye sattığı Vilâyet-i Rumeli’nde Mazarak kazâsına tâbi‘ Kızılkaya nâm karye sâkinelerinden Papa Dimitri v. Miho nâm râhib tarafından husûs-ı âti’z-zikre vekîl olup Zaho v. Kamene ve Yani v. Dimo nâm zimmîler şehâdetleriyle şer‘an vekâleti sâbite olan Göni v. Nikola nâm vekîl meclis-i şer‘-i şerîf-i ezherde işbu râfi‘ü’l-vesîka İstilo v. Yani nâm zimmî muvâcehesinde bi’l-vekâle ikrâr ve i‘tirâf edip müvekkilim merkūm Papa Dimitri emlâkinden karye-i mezbûrede mevâzi‘-i müteferrikada vâki‘ on beş dip zeytin eşcârını mersûm İstilo’ya târih-i kitâbdan yüz elli gün tamâmına değin on beş kıt‘a riyâlî kebîr guruşa bey‘ bi’l-vefâ vechi üzre bey‘ edip ol dahi vech-i meşrûh üzre iştirâ ve kabûl eyledikden sonra semeni olan meblağ-ı mezbûru merkūm İstilo yedinden tamâmen ahz ü kabz eyledim, eğer meblağ-ı mezbûru ecel-i mezbûr hulûlünde mersûm İstilo’ya edâ ve teslîm etmez isem bey‘-i mezbûr bâtte münkalib olsun ve zikr olunan eşcârı mahallinde zabt ve tasarrufa merkūm İstilo’yu taslît eyledim dedi dedikde, mukırr-ı mezbûrun minvâl-i muharrer üzre bi’l-vekâle cârî ve sâdır olan ikrârını mersûm İstilo vicâhen ve şifâhen tasdîk ve tahkīk etmeğin mâ vaka‘a bi’l-ibtigā ketb olundu. Fi’l-yevmi’l-ışrîn min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Ali b. Mustafa, Abdullah b. İskender, Hüseyin b. Ali, Dilâver b. Abdullah ve gayruhüm mine’l-hâzırîn İstati, Nikola, Dimo, Kiryaki, Yorgo, Hıristo, Miho, Yani, Simo, Zeto ve gayr