Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 83 Hüküm no: 52 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Karaca v. Koco’nun Hasan b. Abdullah ile Yani v. Yorgi’ye sattığı koyunların bedelini talep ettiği Çoban tâ’ifesinden işbu râfi‘ü’l-vesîka Karaca v. Koco nâm zimmî meclis-i şer‘-i şerîf-i enverde yine tâ’ife-i mezbûreden Hasan b. Abdullah nâm kimesne ile Yani v. Yorgi nâm zimmî muvâcehelerinde üzerlerine da‘vâ ve takrîr-i kelâm edip mezbûrân Hasan ve Yani zimmetlerinde seksen re’s koyun her re’si yüz on beşer akçeye ve on re’s koyun her re’si altmışar akçeden cem‘an doksan re’s koyun bahâsından dokuz bin sekiz yüz akçe hakkım olup hâlen taleb ederin suâl olunsun dedikde gıbbe’s-suâl merkūmân Hasan ve Yani cevâblarında fi’l-hakīka müdde‘î-i mezbûr Karaca’ya minvâl-i meşrûh üzre koyun bahâsından meblağ-ı mezbûru’n-na‘t dokuz bin sekiz yüz akçe zimmetimizde lâzımü’l-edâ ve vâcibü’l-kazâ deynimiz vardır deyû her biri tav‘an ikrâr ve i‘tirâf ettiklerinde ikrârları mûcebince meblağ-ı mezbûru müdde‘î-i merkūma edâsıyla mersûmân Hasan ve Yani ilzâm olunup mâ hüve’l-vâki‘ bi’l-ibtigā ketb olundu. Fi’l-yevmi’l-ışrîn min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Abdullah Efendi b. Mehmed el-Mukayyid, Mustafa Beşe b. Abdullah çukadâr, Ali Beşe b. Mustafa, Abdullah Beşe b. İskender, Hüseyin Çelebi b. Ali, Dilâver b. Abdullah ve gayruhüm mine’l-hâzırîn