Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 83 Hüküm no: 53 Orijinal metin no: [10a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdurrahman Çelebi b. Habib’in tasarrufundaki vakıf menzil ile yoğurtçu dükkânını zevcesi Kalender bt. Abdullah’a devrettiği Husûs-ı âti’z-zikrin mahallinde ketb ve terk[ī]mi iltimâs olunmağın kıbel-i şer‘-i kavîmden fahrü’l-müderrisîn Surûrî Mustafa Efendi b. Hasan irsâl olunup ol dahi zeyl-i kitâbda mastûretü’l-esâmî müslimîn ile medîne-i Hazret-i Ebâ Eyyûb el-Ensârî’de Cezerî Kasım Paşa mahallesi sâkinlerinden fahrü’l-eşbâh Abdurrahman Çelebi b. Habib nâm kimesnenin menziline varıp akd-i meclis-i şer‘-i şerîf eyledikde müşârun-ileyh Abdurrahman Çelebi meclis-i ma‘kūd-ı mezkûrda zevcesi hâmilet-i hâzihi’l-vesîka Kalender bt. Abdullah nâm hâtun muvâcehesinde tasarrufât-ı şer‘iyyesi nâfize olduğu hâlde ikrâr ve i‘tirâf edip mahrûse-i Kostantıniyye’de merhûm Ferhad Kethüdâ Vakfı’ndan icâre-i mu‘accele-i ma‘lûme ve yevmî iki akçe ücret-i müeccele ile tasarrufumda olup mahalle-i mezbûrede vâki‘ bir tarafdan ba‘zan Mustafa Çelebi b. el-Hâc Mehmed mülkü ve ba‘zan Osman Çelebi b. Ahmed mülkü ve bir tarafdan ba‘zan Eyüb Çelebi ve ba‘zan Mustafa Beşe b. Hasan tasarrufunda olan dükkân ve iki tarafdan tarîk-i âm ile mahdûd beş bâb fevkānî ve iki bâb tahtânî odaları ve bir matbah ve bir su kuyusu ve bir mikdâr hadîkayı ve kenîfi müştemil olup mutasarrıf olduğum vakıf menzilimi ve muttasıl yoğurtçu dükkânını merkūme Kalender Hâtun’a vakf-ı mezbûr mütevellîsi ma‘rifetiyle otuz bin cedîd akçe bedel mukābelesinde tefvîz ve ferağ eylediğimde zevcem mezbûre Kalender Hâtun dahi minvâl-i mübeyyen üzre tefevvuz ve kabûl eyledikden sonra mukābele-i ferağında olan bedel-i mezbûr otuz bin akçeyi zevcem merkūm Kalender Hâtun yedinden bi’t-tamâm ve’l-kemâl ahz ü kabz eyledim, ba‘de’l-yevm menzil-i mahdûd-ı mezkûrda ve muttasıl yoğurtçu dükkânında benim vechen mine’l-vücûh alâka ve medhalim yokdur, mezbûre Kalender Hâtun menzil-i mezbûr ile zikr olunan yoğurtçu dükkânını emsâli tasarrufu gibi mutasarrıfe olsun dedikde gıbbe’t-tasdîki’ş-şer‘iyyi’l-vicâhî husûs-ı mezbûru Mevlânâ-yı mezbûr mahallinde ketb ü tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâdis min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Fahrü’l-ekârim Ahmed Ağa b. Ali, Alemüddîn Efendi b. Süleyman, Şeyh Mehmed Efendi b. Ramazan, Süleyman Ağa b. Hasan, Şeyh Abdullah Efendi b. İsa, el-Hâc Mehmed b. Mustafa, Sinan Efendi b. Derviş, Mehmed Çelebi b. Veli, Mehmed Çelebi b. Yusuf, Mustafa Beşe b. Hasan, Mustafa Beşe b. Mehmed, Ali Beşe b. Mustafa ve gayruhüm mine’l-hâzırîn