Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 85 Hüküm no: 55 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. el-Hâc Mehmed ile kardeşi İbrahim’in mülk menzillerini Mehmed b. Ahmed’e sattıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- mahallâtından Evlice Baba mahallesi sâkinlerinden Mehmed b. el-Hâc Mehmed nâm kimesne ile li ebeveyn er karındaşı olup bülûğuna mu‘terif olan İbrahim nâm mürâhık meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâb Mehmed b. Ahmed nâm kimesne mahzarında her biri tâyi‘an ikrâr ve i‘tirâf edip silk-i mülkümüzde münselik olup mahalle-i mezbûrede vâki‘ bir tarafdan Zeynî Hâtun mülkü ve bir tarafdan Ali Beşe b. Osman mülkü ve bir tarafdan mekābir-i müslimîn ve taraf-ı râbi‘i tarîk-i âm ile mahdûd bir bâb fevkānî ve bir bâb tahtânî odaları ve bir su kuyusunu ve kenîfi ve hadîkayı müştemil mülk menzilimizi cemî‘ tevâbi‘ ve levâhıkı ile mezbûr Mehmed’e sekiz bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve tesellüm ve kabz ve kabûl eyledikden sonra semeni olan mezbûru’n-na‘t sekiz bin akçeyi mezbûr Mehmed yedinden tamâmen ahz ü kabz eyledik ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye alâkamız kalmadı mezbûr Mehmed’in mülk-i müşterâsı ve hakk-ı sırfı olmuşdur keyfemâ yeşâ ve hasbemâ yehtâr mutasarrıf olsun dediklerinde mukırrân-ı mezbûrân Mehmed ve İbrahim’in minvâl-i muharrer üzre cârî ve sâdır olan ikrârlarını el-mukarru lehü’l-mezbûr Mehmed vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min Şa‘bâni’l-mu‘azzam li sene hamsin ve sittîn ve elf. Şuhûdü’l-hâl: Şaban Efendi b. Ebîbekir el-İmâm, el-Hâc Mehmed b. Zülfikar, Bâli Beşe b. Derviş, Mehmed Beşe b. Hızır, Ebûbekir b. Ali, Hasan Çelebi b. Mehmed, Mustafa Beşe b. Abdullah, Ali Beşe b. Mustafa, Abdullah Beşe b. İskender ve gayruhüm [mine’l-hâzırîn]