Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 85 Hüküm no: 56 Orijinal metin no: [10b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. İstemad’ın İstati v. İskarlet’e sattığı koyun bedelinden alacağı olduğu Celebkeşân tâ’ifesinden işbu râfi‘ü’l-kitâb Dimitri v. İstemad nâm nasrânî meclis-i şer‘-i şerîf-i lâzımü’t-tevkīrde sütçü tâ’ifesinden İstati v. İskarlet nâm zimmî muvâcehesinde üzerine da‘vâ ve takrîr-i kelâm edip mezbûr İstati zimmetinde beher re’si yüz doksan dokuz akçeye olmak üzre cem‘an beş yüz yirmi yanı kuzulu koyun semeninden yüz üç bin beş yüz seksen akçe hakkım olup meblağ-ı mezbûrun bundan akdem elli yedi bin altı yüz akçesini yedinden ahz ü kabz edip hâlen semen-i bâkī kırk beş bin dokuz yüz seksen akçe hakkımı taleb eylediğimde vermede te‘allül eder suâl ol[un]sun dedikde gıbbe’s-suâl merkūm İstati cevâbında fi’l-hakīka müdde‘î-i mesfûr Dimitri’ye vech-i muharrer üzre zikr olunan koyun bahâsından cem‘an yüz üç bin beş yüz seksen akçe deynim olmağla bundan akdem elli yedi bin altı yüz akçesini müdde‘î-i merkūm Dimitri’ye teslîm etmekle hâlen zimmetimde semen-i bâkī kırk beş bin dokuz yüz seksen akçe müdde‘î-i mezbûra vâcibü’l-kazâ deynim vardır deyû bi tav‘ihî ikrâr ve i‘tirâf etmeğin mûcebiyle ba‘de’l-hükm mâ hüve’l-vâki‘ bi’t-taleb ketb olundu. Fi’l-yevmi’r-râbi‘ ve’l-ışrîn min Şa‘bâni’l-mükerrem li sene hamsin ve sittîn ve elf. Şuhûdü’l-hâl: Mustafa Beşe b. Abdullah, Ali Beşe b. Mustafa, Hüseyin Beşe b. Ali, Bayram b. Mehmed ve gayruhüm mine’l-hâzırîn