Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 89 Hüküm no: 62 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim b. Mehmed’in ölen annesi Canfeda bt. Abdullah’ın mehir alacağından hissesini talep ettiği üvey babası Mehmed Bey b. Hasan ile sulh oldukları Medîne-i Hazret-i Ebâ Eyyûb el-Ensârî’de Ali Paşa-yı cedîd mahallesinde sâkine iken bundan akdem vefât eden Canfeda bt. Abdullah nâm hâtunun verâseti zevc-i metrûkü Mehmed Bey b. Hasan nâm kimesne ile sadrî kebîr oğulları Abdülkerim ve İbrahim ibney Mehmed nâm kimesnelere münhasıra olduğu şer‘an zâhir ve müte‘ayyin oldukdan sonra mezbûr İbrahim meclis-i şer‘-i şerîf-i lâzımü’t-tevkīrde üvey babası mesfûr Mehmed Bey muvâcehesinde ikrâr-ı tâm ve takrîr-i kelâm edip vâlidem merkūme Canfeda’nın zevci mezbûr Mehmed Bey zimmetinde iki bin cedîd akçe mehr-i müecceli olup kable’l-ahz müteveffât olmağla mezbûr Mehmed Bey zimmetinde kalmışidi hâlen meblağ-ı mezbûr iki bin akçeden bi hasebi’l-irsi’ş-şer‘î bana isâbet eden sekiz yüz akçe hisse-i mevrûsemi mezbûr Mehmed Bey’den taleb ve da‘vâ eylediğimde vermede te‘allül etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn [ve] müslimûn tavassut edip hisse-i ma‘hûdum da‘vâsından üç yüz akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûru yedinden tamâmen ahz ü kabz edip hisse-i mezbûrenin mâ‘adâsı beş yüz akçeden merkūm Mehmed Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt eyledim ba‘de’l-yevm mezbûr Mehmed Bey ile mehr-i müeccel-i mesfûrdan hisse-i şer‘iyyeme müte‘allik vechen mine’l-vücûhi’ş-şer‘iyye da‘vâ ve nizâ‘ımız yokdur dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sânî min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Ali Beşe b. Mustafa, Hüseyin Çelebi b. Ali, Mehmed Beşe b. Hasan, Sefer Beşe b. Hızır, Ahmed Beşe b. Mehmed, Abdullah Beşe b. İskender ve gayruhüm