Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 89 Hüküm no: 63 Orijinal metin no: [11b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Bey’in Rüstem b. Abdullah’ı sebepsiz yere topuz ve kılıç ile yaraladığı Havâss-ı aliyye kazâsı nevâhîsinden Terkos nâhiyesi muzâfâtından Hacı Mihaliç nâm karye sükkânından Rüstem b. Abdullah nâm kimesne meclis-i şerî’at-i şerîfede takrîr-i kelâm ve bast-ı merâm edip târih-i kitâbdan üç gün mukaddem vakt-i zuhrda karye-i mezbûrede vâki‘ tarlamdan araba ile buğday demedi getirirken yine karye-i mezbûre sâkinlerinden Ahmed Bey nâm cündî önüme gelip bi gayr-ı vech-i şer‘î başıma topuz ile urup iki yerde mecrûh eyledikden sonra arkama kılıç ile darb edip arkamın sol tarafını mecrûh eylemişdir, hâlen eser-i cerhim keşf ve ba‘de’n-nazar tahrîr olunması matlûbumdur dedikde mukırr-ı mezbûrun eser-i cerhi keşf olundukda fi’l-hakīka vech-i muharrer üzre başının iki yerde topuz yarası ve arkasının sol tarafında kılıç yarası olduğu müşâhede ve mu‘âyene olunmağın vâki‘ hâl hıfzan li’l-makāl bi’l-ibtigā ketb olundu. Fi’l-yevmi’s-sâdis min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Mehmed Ağa b. Abdülbâkī, Muslu Çelebi b. Mehmed, Oruc Beşe b. Ebîbekir, Ali Beşe [b.] Mustafa