Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 90 Hüküm no: 64 Orijinal metin no: [11b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İspelyob v. Kosta’nın Yorgi v. Todori’ye mülk menzili ile iki bağını sattığı, tasarrufundaki altı tarlanın tasarruf hakkını devrettiği Vilâyet-i Rumeli’nde Kalavrite kazâsına tâbi‘ Felebecerato nâm karyede sâkin İspelyot v. Kosta nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Yorgi v. Todori nâm zimmî muvâcehesinde bi tav‘ihî ikrâr ve i‘tirâf edi[p] emlâkimd[en] olup karye-i mezbûrede vâki‘ bir tarafdan Yani v. Koma mülkü ve bir tarafdan Panol v. Kondu mülkü ve bir tarafdan İspelyot v. Düşer mülkü ve bir tarafdan tarîk-i âm ile mahdûd bir bâb fevkānî odayı ve anbarı ve bir şırahâneyi ve bahçeyi müştemil mülk menzilimi ve yine karye-i mezbûre kurbunda vâki‘ hudûdu beynimizde ma‘lûm iki kıt‘a mülk bağlarımı dahi merkūm Yorgi’ye on kıt‘a riyâlî kebîr guruşa bey‘-i bâtt-ı kat‘î ile bey‘ edip [12a] ol dahi vech-i meşrûh üzre iştirâ ve kabûl eyled[ikde]n sonra yine karye-i merkūme sınırı dâhilinde mevâzi‘-i müteferrikada vâki‘ her birinin hudûdu beynimizde ma‘lûm altı kıt‘a tarlalarımın hakk-ı tasarruflarını ma‘rifet-i sâhib-i arz ile mersûm Yorgi’ye beş kıt‘a riyâlî guruş bedel mukābelesinde tefvîz ve ferağ eylediğimde ol dahi tefevvuz ve kabûl eyleyip semen-i mezbûr ile bedel-i mezkûr cem‘an on beş guruşu merkūm Yorgi yedinden tamâmen ahz ü kabz eylediğimden sonra emlâk-i mezbûre ile arâzi-i mezkûreyi mahallinde zabt ve tasarruf[a] mersûm Yorgi’yi tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a bi’l-ibtigā ketb olundu. Fi’l-yevmi’s-sâbi‘ min şehri Ramazân min şuhûri sene hamsin ve sittîn ve elf. Şuhûdü’l-hâl: Ali Beşe b. Mustafa, Abdullah b. Mustafa, Hüseyin Çelebi b. Ali, Süleyman b. Karagöz, Dilâver Beşe b. Abdullah, Bayram Dede b. Mehmed, Andriço v. Nikola, İspelyot v. Nikola