Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 90 Hüküm no: 65 Orijinal metin no: [12a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime Hâtun bt. Osman’ın menzilinin vârisleri tarafından Musa b. Zekeriya’ya satıldığı Medîne-i Hazret-i Ebâ Eyyûb el-Ensârî -âmelehu’llâhu te‘âlâ bi lütfihi’l-cârî-de merhûm Cezerî Kasım Paşa mahallesi sâkinelerinden iken bundan akdem fevt olan Rahime Hâtun bt. Osman nâm müteveffâtın verâseti zevc-i metrûkü İbrahim Halîfe b. Hasan ile li ebeveyn ibn-i ammi Mehmed b. Mehmed nâm kimesneye münhasıra olduğu şer‘an zâhir ve müte‘ayyin oldukdan sonra mezbûrân İbrahim Halîfe ve Mehmed meclis-i şer‘-i şerîf-i enverde işbu râfi‘ü’l-kitâb Musa b. Zekeriya nâm kimesne mahzarında her biri tav‘an ikrâr ve i‘tirâf edip mûrisemiz müteveffât-ı merkūme Rahime Hâtun’un muhallefâtından olup medîne-i mezbûrede Nazperver mahallesinde vâki‘ bir tarafdan mahalle-i mezbûre imâmına meşrûta menzil ve bir tarafdan el-Hâc Ali nâm kimesne tasarrufunda olan menzil ve bir tarafdan tarîk-i hâs ve bir tarafdan tarîk-i âm ile mahdûd iki bâb fevkānî ve bir bâb tahtânî odaları ve su kuyusunu ve kenîfi ve hadîkayı müştemil mülk-i mevr[û]s menzilimizi cemî‘ tevâbi‘ ve levâhıkı ile mezbûr Musa’ya on dört bin fıddî râyic fi’l-vakt akçeye bey‘-i bâtt-ı kat‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan mezbûru’n-na‘t on dört bin akçeyi mezbûr Musa yedinden tamâmen ahz ü kabz eyledik ba‘de’l-yevm menzil-i mahdûd-ı mezkûrda bizim vechen mine’l-vücûhi’ş-şer‘iyye alâkamız kalmadı mezbûr Musa’nın mülk-i müşterâsı olmuşdur keyfemâ yeşâ ve hasbemâ yehtâr mutasarrıf olsun dediklerinde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Davud Efendi b. Mehmed el-İmâm, el-Hâc Mustafa b. Şaban el-Müezzin, Mehmed Bey b. Hasan el-Yesârî?, Mustafa Bey b. İbrahim, Yusuf Bey b. Abdullah, İbrahim Çelebi b. Mehmed, el-Hâc İbrahim Halîfe b. Ebîbekir, Ali Beşe b. Mustafa, Hüseyin Çelebi b. Ali, İbrahim Çelebi b. Ahmed, Dilâver Beşe b. Abdullah ve gayruhüm mine’l-hâzırîn