Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 91 Hüküm no: 66 Orijinal metin no: [12a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Rizo’nun mülk menzil yerini Franko v. Yani’ye sattığı Vilâyet-i Rumeli’nde Çatalca kazâsına tâbi‘ Nihor Kosta nâm karyede sâkin Yani v. Rizo nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Franko v. Yani nâm zimmî muvâcehesinde bi tav‘ihî ikrâr ve i‘tirâf edip silk-i mülkümde münselik karye-i mezbûrede vâki‘ bir tarafdan Yani v. Yorgi mülkü ve bir tarafdan yine benim âhar mülküm ve iki tarafdan tarîk-i âm ile mahdûd ve mümtâz bir kıt‘a bostan yerini müştemil mülk menzil yerimi mersûm Franko’ya beş bin beş yüz fıddî râyic nakid fi’l-vakt akçeye taraf[ey]nden îcâb ve kabûl[ü] hâvî bey‘-i bâtt-ı sahîh-i şer‘î ile bey‘ edip ol dahi vech-i meşrûh üzre iştirâ ve kabûl eyleyip semeni olan mezbûru’n-na‘t beş bin beş yüz [akçe]yi merkūm Franko yedinden tamâmen ahz ü kabz eylediğimden sonra mebî‘-i mahdûd-ı mezkûru mahallinde zabt ve tasarrufa mersûm Franko’yu tarafımdan [12b] taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ min şehri Ramazâni’l-mübârek min şuhûri sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Ali Beşe b. Mustafa, Abdullah b. İskender, Dilâver b. Abdullah, Hüseyin b. Ali İstati, Yani, Pavlo, Yani, Verato, Franko, Mestro, Miho, Yani, Yorgi, Todori, Dimo, Kılota?