Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 92 Hüküm no: 67 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Âişe bt. Mustafa’nın Ahmed Bey’de olan alacağını vekili Durmuş Çelebi vasıtasıyla tahsil ettiği Medîne-i Hazret-i Ebâ Eyyûb el-Ensârî -razıye anhü rabbühü’l-melikü’l-Bârî-de Takyecibaşı mahallesi sâkinelerinden Âişe bt. Mustafa nâm hâtun tarafından husûs-ı câ’i’z-zikri ikrâra vekîl olup mezbûreyi ma‘rifet-i şer‘i[yye] ile ârifân olan Ali Çelebi b. Mehmed ve Mustafa Bey b. Mehmed şehâdetleriyle şer‘an vekâlet-i sâbite olan Mahmud Beşe b. Hüseyin nâm kimesne meclis-i şer‘-i şerîf-i enver ve mahfil-i dîn-i münîf-i ezherde işbu râfi‘ü’l-kitâbi’l-müstetâb Durmuş Çelebi b. Ebî Tâlib nâm kimesne muvâcehesinde bi’l-vekâle ikrâr-ı tâm ve takrîr-i kelâm edip vilâyet-i Rumeli‘nde Burgos kazâsına tâbi‘ Turgud Bey demekle ma‘rûf karyede sâkin Ahmed Bey nâm kimesne zimmetinde olan karz-ı şer‘îden on beş bin akçe hakkımı kabza ve yine karye-i mezbûrede mevcûd olan aded[i] beynimizde ma‘lûm öküzlerimi bey‘a ve semeni[ni] kabza ve bana îsâle bundan esbak mezbûr Durmuş Çelebi’yi tarafımdan vekîl ve nâib-i menâbına nasb ve ta‘yîn ol dahi kabûl eyledikden sonra mezbûr Durmuş Çelebi merkūm Ahmed Bey zimmetinde olan on beş bin akçe hakkımı vekâleti hasebiyle kabz edip ve karye-i mezbûrede mevcûd mülk öküzlerimi sekiz bin akçeye bey‘ etmekle cem‘an yirmi üç bin akçe hakkımı ahz ü kabz etmişidi, hâlen meblağ-ı mezbûr yirmi üç bin akçe hakkımı vekîlim olan mezbûr Durmuş Çelebi yedinden tamâmen ahz ü kabz eyledim, ba‘de’l-yevm meblağ-ı mezbûr yirmi üç bin akçeden merkūm Durmuş Çelebi zimmetinde bir akçe ve bir habbe hakkım bâkī kalmadı dedi dedikde vekîl-i mezbûrun minvâl-i mübeyyen üzre cârî ve sâdır olan kelimât-ı mahkiyesini mezbûr Durmuş Çelebi vicâhen tasdîk ve şifâhen tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâmin min şehri Ramazâni’l-mübârek min şuhûri sene hamsin ve sittîn ve elf. Şuhûdü’l-hâl: Mustafa Çelebi b. Musa, İsmail Çelebi b. Muslu, Ali Çelebi b. İbrahim, Ahmed Çelebi b. Ali, Ali Beşe b. Mustafa, Ahmed b. Mehmed, Hüseyin b. Ali