Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 93 Hüküm no: 69 Orijinal metin no: [13a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Beşe b. Hüseyin’in zevcesi Âişe bt. Hüseyin’e küfrettiği için ayrılmalarına hükmedildiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Takyecibaşı mahallesi sâkinelerinden Âişe bt. Hüseyin meclis-i şer‘-i şerîf-i lâzımü’t-tevkīrde zevci Veli Beşe b. Hüseyin nâm râcil mahzarında üzerine da‘vâ ve takrîr-i kelâm edip zevcim mezbûr Veli Beşe târih-i kitâb günü bi gayr-ı vech-i şer‘î benim vâlideme ve dîn-i imânıma cimâ‘ lafzı ile şetm eylediğinden mâ‘adâ bre kahbe bre rospu deyû şetm eylemişdir, hâlen suâl olunup mûceb-i şer‘îsi icrâ olunmak matlûbumdur dedikde, gıbbe[’s-]suâl ve akībe’l-inkâr müdde‘î-i merkūme Âişe Hâtun’dan da‘vâsını mübeyyine beyyine taleb olundukda udûl-i ricâlden olup yine mahalle-i mezbûre sâkinlerinden Ahmed Çelebi b. Ali ve Mustafa b. Musa el-Müezzin ve diğer Mustafa b. Süleyman ve diğer Mustafa [b.] Şaban nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûr Veli Beşe târih-i kitâb günü zevcesi müdde‘iye-i merkūmenin vâlidesine ve dîn-i imânına minvâl-i muharrer [üzre] cimâ‘ lafzı ile şetm eylediğinden mâ‘adâ bre kahbe bre rospu deyû bizim huzûrumuzda şetm eyledi biz bu husûsa minvâl-i muharrer üzre [vech-i] mübeyyen üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle ve mesmû‘a oldukdan sonra mûcebiyle müdde‘iye-i mezbûrenin merkūmdan firkati[n]e hükm olunup mâ vaka‘a gıbbe’t-ta[l]eb ketb olundu. Fi’l-yevmi’t-tâsi‘ min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Selman b. Hamza el-Mübâşir, Hasan Beşe b. Abdullah, Sefer b. Mehmed, Fazlullah b. Ma‘den?