Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 94 Hüküm no: 70 Orijinal metin no: [13a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yagop v. Cane’nin bağını Ahmed Ağa b. Murad’a bey‘ bi’l-vefâ yoluyla sattığı Vilâyet-i Anadolu’da Eğin kasabası sükkânından Yagop v. Cane nâm Ermeni meclis-i şer‘-i şerîf-i lâzımü’t-tevkīrde işbu râfi‘ü’l-kitâb yine kasaba-i merkūme sâkinlerinden Ahmed Ağa b. Murad nâm kimesnenin sulbî kebîr oğlu ve tarafından ikrâr-ı âti’z-zikri tasdîke vekîl olup bimâ hüve tarîkü’s-sübût şer‘an vekâleti sâbite olan Mehmed Çelebi nâm vekîl mahzarında bi tav‘ihî ikrâr ve i‘tirâf edip emlâkimden olup kasaba-i mezbûre kurbunda vâki‘ bir tarafdan Emre bağı bir tarafdan Ağacan bağı ve bir tarafdan Can Azîz bağı ve taraf-ı râbi‘i tarîk-i âm ile mahdûd ve mümtâz bir kıt‘a mülk bağımı odasıyla mezbûr Ahmed Ağa’ya târih-i kitâbdan üç yüz seksen gün tamâmına değin bey‘ bi’l-vefâ vechi üzre yüz kırk kıt‘a riyâlî kebîr guruşa bey‘ edip ol dahi vech-i muharrer üzre iştirâ ve kabûl eyledikden sonra semeni olan merkūmü’l-vasf yüz kırk guruşu mezbûr Ahmed Ağa yedinden tamâmen ahz ü kabz eyledim eğer meblağ-ı mezbûru ecel-i mezkûr hulûlünde merkūm Ahmed Ağa’ya edâ ve teslîm etmez isem bey‘-i mezbûr bâtte münkalib olsun ve mebî‘-i mezbûru mahallinde zabt ve tasarrufa mezbûr Ahmed Ağa’yı tarafımdan taslît eyledim dedikde mukırr-ı mezbûrun minvâl-i mübeyyen üzre cârî ve sâdır olan ikrârını vekîl-i mezbûr Mehmed Çelebi vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-âşir min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Mehmed b. Abdullah, Ali b. Mustafa, Abdullah b. İskender, Dilâver b. Abdullah, David v. Yagop, Hoşan v. Yagop, Mardoros v. Belot ve gayruhüm mine’l-hâzırîn