Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 94 Hüküm no: 71 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vezîriazam Murad Paşa’nın kethüdâsı Mehmed Ağa’nın evine akıtmak üzere Müderris köyünde tarlada açtırdığı kuyulardan çıkardığı suyun keşfinin yapıldığı [Derkenâr] Murad Paşa Suyu Hâlen sadrazam vezir-i mu‘azzam düstûr-ı mübeccel müşîr-i müşârun-ileyh bi’l-benân sâhibü’l-cûd ve’l-ihsân nâzım-ı nizâmü’l-âlem muslih-ı mesâlih-i benî âdem râfi‘-i a‘lâmü’l-adli ve’l-insâf dâfi‘-i zalâmü‘z-zulmeti ve’l-a‘tâf vekîlü’s-sa[l]tanati’s-seniyye emînü’d-devleti’l-aliyye el-mahsûs bi umûmi’l-meliki’l-a‘lâ Vezîriazam Murad Paşa -yesserallâhu bi’l-hayri mâ yeşâ- hazretlerinin kethüdâları işbu kitâbü’s-sıhhat-nisâbın sâhibi iftihârü’l-emâcid ve’l-ekârim câmi‘u[’l-]mehâmid ve’l-mekârim zü’l-kadri[’r-]refî‘ ve’l-câhi’l-menî‘ Mehmed Ağa hazretlerinin babası ve taraf-ı pür-şereflerinden husûs-ı âti’z-zikre sâbitü’l-vekâle vekîl-i şer‘îleri umdetü’l-eşbâh Ramazan Ağa b. Cafer nâm kimesne meclis-i şer‘-i şerîfde bi’l-vekâle takrîr-i kelâm ve ta‘bîr ani’l-merâm [edip] müvekkil-i müşârun-ileyh Mehmed Ağa’nın mahrûse-i Kostantıniyye hısn-ı ebvâbından Silivri Kapısı dâhilinde Karabaş mahallesinde vâki‘ mülk menzilinde icrâ için Havâss-ı refî‘a -hamâha’llâhu te‘âlâ ani’l-beliyye- kazâsına tâbi‘ Müderris köyü demekle ma‘rûf karye sınırı dâhilinde vezîr-i rûşen-zamîr müşîr-i müşterî-pezîr sâbıkan kapudân olan Mustafa Paşa hazretlerinin tasarruflarında vâki‘ ma‘lûmü’l-hudûd tarlada bundan akdem paşa-yı müşârun-ileyh Mustafa Paşa’nın izniyle müvekkil-i mûmâ-ileyh âbâr-ı müte‘addide hafr ettirmişidi, hâlen ol âbâr-ı müteferrikadan cem‘ ve tahsîl olunan miyâhın savb-ı şer‘-i şerîfden üzerine varılıp erbâb-ı miyâh beynlerinde mu‘tâd olan tarz-ı ma‘rûf ve semt-i me’lûf üzre hafr olunan âbârdan hâsıl olan mâ’nın mikdârı vezn ve ayâr ve tahmîn-i sahîh ile tahmîn ve ilhâk ve ifrâzı ta‘yîn olunmak murâdımdır [de]dikde, kıbel-i şer‘den fahrü’l-müderrisîn Surûrî Mustafa Efendi irsâl olunup ol dahi hâssa mi‘mârbaşı iftihârü’l-[e]mâcid ve’l-e‘âlî câmi‘u’l-mehâmid ve’l-me‘âlî Mustafa Ağa b. Abdülbârî ve hâssa suyolu nâzırlarından a‘yünü’l-a‘yân makbûlü’s-sudûr ve’l-erkân Ali Ağa b. Yunus ve râh-ı âbîler kethüdâsı el-Hâc Mehmed b. Mustafa ve yiğitbaşıları el-Hâc Ahmed b. Ömer ve el-Hâc Abbas b. Mehmed ve Ahmed b. Ömer ve Osman b. Murtaza ve zeyl-i kitâbda isimleri mastûr olan bî-garaz müslimîn ile miyâh-ı mezkûrun üzerine varıp keşf ve müşâhede ve vezn ve ayâr olundukda kâmil iki masura su cârî olup mevcûd olduğunu erbâb-ı miyâh icmâ‘ ve ittifâk eyledikden sonra cennet-mekân firdevs-i âşiyân merhûm Sultan Mehmed Hân hazretlerinin Turunçluk Suyu demekle ma‘rûf olan suyu ol mevzi‘e karîb olmağla mütevellî izniyle ona ilhâk olunup bir masura su hakk-ı icrâ alınıp bâkī bir masura suyu müvekkil-i müşârun-ileyh mahrûse-i merkūmede murâd eylediği mahalleden ifrâz ve zikri sebk eden menzilden icrâ etmek üzre alâ vechi’l-mu‘tâd ve neski’l-i‘tiyâd vezn ve ayâr ve tahmîn ve ta‘yîn eylediklerini Mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fî evâili Ramazâni’l-mübârek li sene hamsin ve sittîn ve elf. Şuhûdü’l-hâl: El-Hâc Ömer b. Abdullah, Halil Beşe b. Mehmed, Mustafa Çelebi b. Mustafa, Ahmed b. el-Hâc Ahmed, İbrahim b. el-Hâc Ramazan, [14a] el-Hâc Yahya b. Abdullah, Abdullah b. Abdullah, Ahmed b. el-Hâc Ahmed, İbrahim Efendi el-Müderris, Muslu Çelebi b. Hasan