Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 96 Hüküm no: 72 Orijinal metin no: [14a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Budakzâde Mehmed Efendi’nin evine akıtmak üzere Bedros köyünde açtırdığı kuyulardan çıkardığı suyun keşfinin yapıldığı [Derkenâr] Budakzâde Mehmed Efendi Suyu Dârü’l-hilâfeti’l-aliyye Kostantıniyyetü’l-mahmiyye hısnı ebvâbından Silivri Kapısı dâhilinde vâki‘ Karabaş mahallesi sükkânından işbu râfi‘ü’l-kitâbi’l-müstetâb umdetü’l-emâcid ve’l-e‘âlî Budakzâde Mehmed Efendi nâm kimesne meclis-i şer‘de ikrâr-ı tâm ve takrîr-i kelâm edip zikr olunan mâ’nın menzilimde cârî olmak için bundan akdem Havâss-ı aliyye kazâsına tâbi‘ Bedros nâm karye kurbunda umdetü’l-havâs ve’l-mukarrebîn mu‘temedü’l-mülûk ve’s-selâtîn hâlen Dârü’s-sa‘âde ağası izzetlü Bayram Ağa hazretlerinin yed-i tasarruflarında olan ma‘lûmü’l-hudûd ve’l-cevânib çayırda kendi hâlis mâlım ile âbâr-ı müteferrika hafr ettirmişidim, hâlen ol hafr olunan âbâr-ı müte‘addideden cem‘ ve tahsîl olunan miyâhın kıbel-i şer‘-i şerîfden üzerine varılıp erbâb-ı miyâh beynlerinde mu‘tâd olan tarz-ı ma‘rûf ve semt-i me’lûf üzre cem‘ ve tahsîl olunan mâ’nın mikdârı vezn ve ayâr ve tahmîn ve takvîm olunmak matlûbumdur dedikde, cânib-i şer‘-i kavîmden umdetü’l-müderrisîn Surûrî Mustafa Efendi irsâl olunup hâssa mi‘mârbaşı umdetü’l-e‘âlî ve’l-ekârim zübdetü’l-me‘âlî ve’l-mekârim Mustafa Ağa b. Abdürrahim ve hâssa suyolu nâzırı olan aynü’l-a‘yân makbûlü’s-sudûr ve’l-erkân Ali Ağa b. Yunus ve râh-ı âbîler kethüdâsı el-Hâc Mehmed b. Mustafa ve yiğitbaşıları el-Hâc Ahmed b. Ömer ve el-Hâc Abbas b. Mehmed ve Ahmed b. Ömer ve Osman b. Murtaza ve zeyl-i vesîkada mastûrü’l-esâmî bî-garaz ehl-i vukūf müslimîn ile cem‘ ve tahsîl olunan miyâhın üzerine varıp keşf ve müşâhede ve vezn ve ayâr eylediklerinde kâmil bir masura su cârî olup mevcûd olduğunu icmâ‘ ve ittifâk eylediklerinden sonra cennet-mekân firdevs-âşiyân merhûm Sultan Mehmed Hân -aleyhi’r-rahmetü ve’l-gufrân- hazretlerinin Turunçluk Suyu demekle ma‘rûf olan suyu ol mahalle karîb olmağla mütevellîsi izniyle âna ilhâk ve idrâc olunup bir masura suyun buçuk masurası hakk-ı mecrâ alıkonuldukdan sonra bâkī kalan buçuk masura suyu müşârun-ileyh Mehmed Efendi mahmiye-i mezbûrede murâd eylediği mahalden ifrâz ve zikri mürûr eden mülk menzilinde icrâ etmek üzre her biri alâ vechi’l-mu‘tâd ve neski’l-i‘tiyâd vezn-i sahîh ile vezn ve ayâr ve tahmîn-i sarîh ile tahmîn ve ta‘yîn eylediklerini Mevlânâ-yı müşârun-ileyh mahallinde ketb ve terkīm ba‘dehû meclis-i şer‘a gelip alâ vukū‘ihî inhâ ve takrîr-i etmeğin mâ hüve’l-vâki‘ gıbbe’t-taleb ketb olundu. Fî evâili şehri Ramazâni’l-mübârek li sene hamsin ve sittîn ve elf. Şuhûdü’l-hâl: Es-Sâbikūne’l-evvelûn