Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 100 Hüküm no: 78 Orijinal metin no: [15a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Hasan’ın mülk menzilini zevci Ali Beşe b. Mehmed’e sattığı Mahrûse-i İstanbul’da Karagümrük kurbunda sâkine Rahime bt. Hasan nâm hâtun meclis-i şerî’at-i şerîfede zevci işbu râfi‘ü’l-kitâb Ali Beşe b. Mehmed nâm kimesne mahzarında ikrâr-ı tâm ve takrîr-i kelâm edip Havâss-ı sultâniyye kazâsına tâbi‘ Yeniceköy demekle ma‘rûf karyede vâki‘ bir tarafdan Anadolulu İsmail Beşe nâm kimesne mülkü ve bir tarafdan Kurd Beşe çayırı ve bir tarafdan Celebzâde tarlası ve bir tarafdan tarîk-i âm ile mahdûd olup bir bâb tahtânî odayı ve bir sofayı ve bir su kuyusunu ve bir fırını ve iki gözlü bir kıt‘a anbarı ve zât-ı eşcârı müsmire ve gayr-ı müsmire hadîkayı ve kenîfi müştemil olan mülk menzilimi bi cümleti’t-tevâbi‘ ve’l-levâhık zevcim mezbûr Ali Beşe’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile altı bin cedîd akçeye bey‘ ve teslîm ol dahi minvâl-i mübeyyen üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûr altı bin akçeyi mezbûr Ali Beşe yedinden bi’t-tamâm ve’l-kemâl ahz ü kabz eyledim ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye benim alâkam kalmadı zevcim mezbûr Ali Beşe’nin mülk-i müşterâsı olmuşdur keyfemâ yeşâ ve yehtâr mutasarrıf olsun dedikde gıbbe’t-tasdîki’ş-şer‘iyyi’l-vicâhî mâ vaka‘a bi’l-ibtigā ketb olundu. Fi’l-yevmi’s-sâdis aşer min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Mustafa Bey b. Ebîbekir, Kurd Beşe b. Yusuf, Hüseyin Beşe b. Mustafa, Ahmed Beşe b. Mehmed, Hüseyin Kethüdâ b. Ahmed, Ali Beşe el-Muhzır, Hüseyin el-Muhzır ve gayr