Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 101 Hüküm no: 79 Orijinal metin no: [15a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgo v. Dimitri’nin ölen karısı ve baldızına ait menzili daha önce vekaleten Alagöz v. Simo’ya sattığı, vereselerin menzilde haklarının kalmadığı Havâss-ı Kostantıniyye kazâsına tâbi‘ Bahçe-i Belgrad köyü demekle ma‘rûf karye sâkinlerinden Yorgo v. Dimitri nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Alagöz v. Simo nâm zimmî muvâcehesinde ikrâr-ı tâm ve takrîr-i kelâm edip karye-i merkūmede vâki‘ bir tarafdan Yani nâm zimmî mülkü ve etrâf-ı selâseden tarîk-i âm ile mahdûd bir bâb tahtânî odayı ve havluyu müştemil mülk menzil bundan akdem birbiri ardınca hâlike olan zevcem Lesaro bt. Şütün nâm nasrânîye ile li ebeveyn kız karındaşı Alekse nâm nasrâniyenin mülkü olup târih-i kitâbdan bir sene mukaddem hâliketân-ı merkūmetân menzil-i mezkûru bey‘a ve kabz-ı semene beni vekîl etmişler idi, ben dahi vekâlet-i mahkiyem hasebiyle târih-i mezbûrda menzil-i mahdûd-ı mezkûru merkūm Alagöz’e üç bin cedîd akçeye bey‘-i bâtt-ı kat‘î ile bey‘ ve teslîm edip ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûru mersûm Alagöz yedinden tamâmen alıp kabz etmişidim, el-hâletü hâzihî menzil-i mezbûrda ne benim ve ne sâir veresenin alâkası kalmamışdır, mersûm Alagöz’ün mülk-i müşterâsıdır keyfemâ yeşâ ve yehtâr mutasarrıf olsun dedikde, mukırr-ı mezbûrun minvâl-i meşrûh üzre cârî ve sâdır olan ikrâr ve takrîrini merkūm Alagöz vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fî 16 min Ramazâni’l-mübârek li sene 1065. Şuhûdü’l-hâl: El-Hâc Mehmed b. Abdülbâkī, Ali b. Mustafa, Hüseyin b. Ali, Dilâver b. Abdullah, Zaharya, Esteryo, Şenedomine?, Diyako, Yani, Paroş, Andriye, Polharoni?, Avyori?, Panayot, Yorgo ve gayruhüm mine’l-hâzırîn