Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 101 Hüküm no: 80 Orijinal metin no: [15b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Beşe b. Abdülbâki’nin zevcesi İsmihân’ın subaşı ve adamları tarafından darbedildiği ve öldüğünün tesbiti Havâss-ı Kostantıniyye kazâsına tâbi‘ Terkos nâhiyesi muzâfâtından Yassıviran nâm karye sâkinlerinden hâmil-i hâze’l-kitâb Hasan Beşe b. Abdülbâkī nâm kimesne meclis-i şer‘-i hatîr-i lâzımü’t-tevkīrde takrîr-i kelâm ve ta‘bîr ani’l-merâm edip karye-i merkūme kurbunda vâki‘ Çayırlı tarla demekle ma‘rûf mevzi‘de târih-i kitâbdan bir gün mukaddem zevcem İsmihân bt. Ahmed nâm hâtun ile kendi hâllerimizde buğday biçerken karye-i mezbûre subaşısı olup gāibü’l-meclis Mahmud nâm kimesne beş nefer hizmetkârıyla gelip zevcem mezbûrenin başına ve arkasına ve ellerine ve kollarına yumruk ve tepme ile bi gayr-ı hakkın darb etmekle mecrûh etmişidi, hâlen zevcem mezbûre İsmihân Hâtun ol darbdan müteveffât olmuşdur, kıbel-i şer‘den üzerine [varılıp] eser-i darbı keşf ve müşâhede olunmasın taleb ederin dedikde, cânib-i şer‘-i kavîmden Mevlânâ Ahmed Efendi irsâl olunup ol dahi zeyl-i kitâbda mastûrü’l-esâmî müslimîn ile üzerine varılıp keşf olundukda fi’l-hakīka mezbûrenin sağ elinin ayası ve sol elinin salavât parmağı ile orta parmağı ve göğsü üstü ve boynu ve sağ cânibi koltuğuna varınca kara ve bere olup vech-i muharrer üzre yumruk ve tepme darbından vefât eylediğini müşâhed[e] ve mu‘âyene eylediklerinden sonra vâki‘ü’l-hâli Mevlânâ-yı mezbûr mahallinde ketb ü tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâmis aşer min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Musa Efendi b. Yahya el-İmâm, Halil Halîfe b. Abdullah el-Müezzin, Habib Beşe b. Kasım, İbrahim b. Mehmed, Mehmed Çelebi b. Subaşı, Rıdvan Beşe b. Abdullah, Abd[ullah] b. İskender, Bayram Sofu b. Mehmed, Ali Beşe b. Mustafa, Hüseyin Beşe b. Ali