Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 102 Hüküm no: 81 Orijinal metin no: [15b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Duka v. Dedo’nun mülk menzilini Yorgo v. Niko’ya sattığı Vilâyet-i Rumeli’nde Ergirikasrı kazâsına tâbi‘ Taranosta nâm karye sâkinlerinden Duka v. Dedo nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Yorgo v. Niko nâm zimmî muvâcehesinde bi tav‘ihî ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ bir tarafdan Sago v. Hıristo mülkü ve bir tarafdan Duka v. Dimo mülkü ve bir tarafdan Papa Komun mülkü ve tarafı râbi‘i tarîk-i âm ile mahdûd taşdan mebnî üç tabaka kuleyi ve samanlığı ve zât-ı eşcârı müsmire ve gayr-ı müsmire bahçeyi müştemil mülk menzilimi cemî‘ tevâbi‘iyle merkūm Yorgo’ya dört bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ edip ol dahi vech-i muharrer üzre iştirâ ve kabûl eyleyip semeni olan mezbûru’n-na‘t dört bin akçeyi mersûm Yorgo yedinden tamâmen ahz ü kabz eylediğimden sonra mebî‘-i mahdûd-ı mezkûru mahallinde zabt ve tasarrufa mezbû[r] Yorgo’yu tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ vaka‘a bi’l-ibtigā ketb olundu. Fi’l-yevmi’s-sâmin aşer min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Ali b. Mustafa, Hüseyin b. Ali, Dilâver b. Abdullah, Abdullah b. İskender, Kiro, Yani, Sago?, Hıristo, Nasari?, Keroh?, Stokoni?, Giro, Duka, Niko, Panko, Anderico, Papa Angeli, Dimo