Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 103 Hüküm no: 82 Orijinal metin no: [15b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihân bt. Ahmed’in subaşı tarafından darbedilerek öldürüldüğü, vârislerinin köy halkını mesûl tutmadıkları Husûs-ı câ’i’l-beyânın mahallinde ketb ve terkīmi iltimâs olunmağın kıbel-i şer‘-i kavîmden Mevlânâ Ahmed Efendi irsâl olunup ol dahi zeyl-i vesîkada muharrerü’l-esâmî bî-garaz müslimîn ile Havâss-ı Kostantıniyye -hamâha’llâhu te‘âlâ ani’l-ahrufi’l-beliyye- kazâsı [i]htivâsından Terkos nâhiyesine tâbi‘ Yassıviran nâm karyede sâkin Hasan Beşe b. Abdülbâkī nâm kimesnenin menziline varıp akd-i meclis-i şer‘-i şerîf eyledikde târih-i kitâbdan bir gün mukaddem madrûben fevt olan İsmihân bt. Ahmed nâm müteveffâtın verâseti zevc-i metrûkü mez[bû]r Hasan Beşe [ve] sadrî kebîr oğlu Ahmed ve sadriye kebîre kızı Râbia Hâtun’a münhasıra olduğu şer‘an zâhir ve müte‘ayyin oldukdan sonra verese-i merkūme zikr olunan Yassıviran karyesi ahâlîsi mahzarında her biri verâseti hasebiyle ikrâr ve takrîr-i kelâm edip târih-i kitâbdan bir gün mukaddem mûrisemiz [16a] merkūme İsmihân’ı karye-i merkūme subaşısı Mahmud nâm kimesne katl eylediği ma‘lûmumuz olmağla mûrisemiz müteveffât-ı merkūmenin dem ve diyetine müte‘allik ahâlî-i karye-i merkūme [ile] da‘vâ ve niza‘mız yokdur ve zimmetlerini ibrâ-i âmm-ı kātı‘ü’n-nizâ[‘la] ibrâ ve iskāt eyledik, min ba‘d da‘vâ ve nizâ‘mız yokdur, sudûr dahi ederse lede’l-hükkâ[m-ı] zevi’l-ihtirâm istimâ‘ olunmaya dediklerinde gıbbe’t-tasdîki’ş-şer‘î vâki‘ü’l-hâli Mevlânâ-yı müşârun-ileyh mahallinde ketb ü tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâmis aşer min Ramazâni’l-mübârek li sene hamsin ve sittîn ve elf. Şuhûdü’l-hâl: Mehmed b. Veli el-İmâm, el-Hâc Mahmud b. İbrahim, Rıdvan Beşe b. Abdullah, Sefer Beşe, Abdi b. İskender