Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 103 Hüküm no: 83 Orijinal metin no: [16a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yani v. Dimo’nun İskolo v. Nikola’ya mülk menzilini sattığı ve tasarrufundaki on bir tarlayı devrettiği Havâss-ı aliyye kazâsına tâbi‘ Pendaniçe demekle ma‘rûf karye sâkinlerinden Yani v. Dimo meclis-i şer‘-i şerîf-i lâzımü’t-tevkīrde işbu râfi‘ü’l-vesîka İskolo v. Nikola nâm nasrânî muvâcehesinde bi tav‘ihî ikrâr ve i‘tirâf edip silk-i mülk-i sahîhimde münselik olup karye-i mezbûre[de] vâki‘ bir tarafdan Kasab Hıristo mülkü ve bir tarafdan Zeto mülkü ve iki tarafdan tarîk-i âm ile mahdûd iki tahtânî odalarını ve bir bakkal dükkânını ve bir bağını ve bahçeyi müştemil mülk menzilimi cemî‘ tevâbi‘ ve levâhıkı ile merkūm İskolo’ya yedi bin cedîd akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi vech-i meşrûh üzre iştirâ ve kabûl ve kabz eyledim dedikden sonra merhûm ve mağfûrun-leh Sultan Bayezid Hân -aleyhi’r-rahmetü ve’r-rıdvân- hazretlerinin evkāfı arâzisinden olup karye-i mezbûrede mevâzi‘-i müteferri[ka]da her birinin hudûdu beynimizde ma‘lûm on bir kıt‘a tarlalarımın dahi hakk-ı tasarruflarını ma‘rifet-i mütevellî ile mersûm İskolo’ya iki bin akçe bedel mukābelesinde tefvîz ve ferağ eylediğimde ol dahi tefevvuz ve kabûl eyledikden sonra semen-i mezkûr ile bedel-i mezbûr cem‘an dokuz bin akçeyi merkūm İskolo yedinden tamâ[men] ahz ü kabz eyledim ba‘de’l-yevm menzil-i mahdûd-ı [mez]kûr mezbûr İskolo’nun mülk-i müşterâsıdır keyfemâ yeşâ ve yehtâr mutasarrıf olsun tarlalar dahi dâhil-i taht-ı tasarruf[u] olmuşdur emsâli tasarrufu gibi tasarruf eylesin dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâdî [ve]’l-ışrîn min Ramazâni’l-mübârek li sene hamsin ve sittîn ve elf. Şuhûdü’l-hâl: Hüseyin Beşe b. Ali, Abdullah b. İskender, Dilâver b. Abdullah, Manol, Pendaz, Hıristo, Sano, Atnaş, Kamanoz, Yani, İstemad, Yorgi, Rizo, Petro, İstemad, Nikola