Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 104 Hüküm no: 84 Orijinal metin no: [16a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Koteni bt. Yani’nin kendisini boşayan kocası Manol v. Mihal’in zimmetini ibrâ ettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Defterî Mahmud Efendi mahallesi sâkinelerinden Koteni bt. Yani nâm nasrânîye meclis-i şer‘-i şerîf-i lâzımü’t-tevkīrde zevc-i sâbıkı işbu hâmilü’l-vesîka Manol v. Mihal nâm zimmî muvâcehesinde bi tav‘ihâ ikrâr ve takrîr-i kelâm edip mezbûr Manol zevcim olup bundan mukaddem talâk-ı bâ’in ile beni tatlîk etmişidi, hâlen merkūm Manol firâşından hâsıl olan hâzır bi’l-meclis Dimitri nâm sagīri hakk-ı hidâne tamâm oluncaya değin kendi mâlım ile infâk ve iksâ edip mezbûr Manol’un zimmetini zevciyete müte‘allik âmme-i da‘vâdan ibrâ ve iskāt eyledim dedikde, mukırr-ı mersûmenin minvâl-i muharrer üzre cârî olan ikrârını merkūm Manol vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek min şuhûri sene hamsin ve sittîn ve elf. Şuhûdü’l-hâl: Mehmed b. Mustafa, Abdülcelîl Beşe b. Ebîbekir, Mustafa b. Ömer, Mahmud b. Mustafa, Abdullah b. İskender, Yanyalı ve Dimo ve Yani evlâd-ı Mihal