Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 105 Hüküm no: 87 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Aspelot v. Andriye’nin Todori v. Dimo’ya muhtelif emlâkını sattığı ve tasarrufundaki arâzileri devrettiği Vilâyet-i Rumeli’nde Kalavrite kazâsına tâbi‘ Delvine nâm karye sâkinlerinden Aspelot v. Andriye nâm zimmî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Todori v. Dimo nâm zimmî muvâcehesinde bi tav‘ihî ikrâr ve i‘tirâf edip silk-i mülkümde münselik olup karye-i mezbûrede vâki‘ bir tarafdan Yani mülkü ve bir tarafdan Dimo mülkü ve bir tarafdan mezbûr Todori mülkü ve taraf-ı râbi‘i tarîk-i âm ile mahdûd bir bâb fevkānî ve bir bâb tahtânî odaları ve bahçeyi müştemil mülk menzilimi cümle tevâbi‘iyle ve kurbunda vâki‘ bir kıt‘a mülk bahçe ile bir kıt‘a harman yerimi ve yine karye-i mezbûrede Ayvasil nâm mevzi‘de vâki‘ bir kıt‘a bağ ve Ku[r]d Beşe bağı kurbunda bir kıt‘a bağ ve iki dağ ortasında bir kıt‘a ki cem‘an üç kıt‘a mülk bağlarımı ve yine karye-i mezbûrede mevâzi‘-i müteferrikada vâki‘ otuz dip dut eşcârımı dahi merkūm Todori’ye altı bin yedi yüz cedîd akçeye bi safkatin vâhidetin bey‘-i bâtt-ı kat‘î ile bey‘ edip ol dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde mevâzi‘-i adîdede vâki‘ inde’l-ahâlî ve’l-cîrân ma‘lûmü’l-hudûd ve’l-kıtâ‘ ve’l-mikdâr tahmînen bir müd tohum istî‘âb eder tarlalarımın hakk-ı tasarruflarını [dahi] ma‘rifet-i sâhib-i arz ile merkūm Todori’ye iki bin akçe bedel mukābelesinde tefvîz bi’l-ferağ eylediğimde ol dahi tefevvuz ve kabûl eyleyip semen-i mezbûr ile bedel-i mezkûr cem‘an sekiz bin beş yüz akçeyi mersûm Todori yedinden tamâmen ahz ü kabz eylediğimden sonra emlâk-i mezbûre ile arâzi-i mersûmeyi mahallinde zabt ve tasarrufa mezbûr Todori’yi tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fî 26 min Ramazâni’l-mübârek li sene 1065. [Şuhûdü’l-hâl:] Mustafa Beşe b. Hasan, Osman Beşe b. Abdullah, Hüseyin Çelebi b. Ali , Dilâver Beşe b. Abdullah ve gayruhüm mine’l-hâzırîn Riga, Yani İstati ve Lesari Yani Andriye, Menun, Lenkoni, Islav, Alikoni, Zaharya, Velesko, Nikola, Yani, Andriye, Nikola