Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 106 Hüküm no: 88 Orijinal metin no: [17a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma Hâtun bt. Hüseyin ile zevcesi İsmail Çelebi b. İbrahim’in muhâlaa ile boşandıkları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Çavuş Kasım mahallesi sâkinelerinden fahrü’l-muhadderât Fâtıma Hâtun bt. Hüseyin tarafından hul‘ ve ibrâ-i âti’z-zikri ikrâra vekîl olup mezbûrenin zâtını ma‘rifet-i şer‘iyye ile ârifân olan Ahmed b. Ali ve Yusuf b. Hasan şehâdetleriyle şer‘an vekâletleri sâbite olan Hasan Çelebi b. Ahmed nâm vekîl meclis-i şer‘-i şerîf-i enverde müvekkile-i mezbûrenin zevc-i muhâlı‘ı hâmilü’l-kitâb İsmail Çelebi b. İbrahim tarafından kezâlik hul‘ ve ibrâ-i câ’i’z-zikri tasdîke vekîl olup şâhidân-ı mezbûrân şehâdetleriyle şer‘an vekâ[le]ti sâbite olan Mehmed Beşe b. Mehmed mahzarında bi’l-vekâle ikrâr-ı tâm ve takrîr-i kelâm edip müvekkilem merkūme Fâtıma Hâtun’un müvekkil-i mezbûr İsmail Çelebi’nin zevcesi olup hüsn-i zindegâneleri olmamağla beynlerinde şikāk-ı küllî vâki‘ olmağın müvekkilem mezbûrenin müvekkil-i merkūm İsmail Çelebi zimmetinde mütekarrir olan on bin cedîd akçe mehr-i müeccelinden geçip ve nafaka-i iddet ve me’ûnet-i süknâsı kendi üzerine olmak üzre mezbûr İsmail Çelebi ile muhâla‘a-i sahîha-i şer‘iyye ile muhâla‘a eyleyip zevciyete müte‘allik âmme-i da‘vâdan mezbûr İsmail Çelebi’nin zimmetini ibrâ ve iskāt eyledi dedikde vekîl-i mezbûr Mehmed Beşe dahi vekâleti hasebiyle minvâl-i muharrer üzre olan hul‘ı kabûl ve ahadühümâ âharın zimmetini zevciyete müte‘allik cemî‘ da‘vâdan ibrâ ve iskāt eyledi dedikde mukırr-ı mezbûr Hasan Çelebi’nin vech-i mübeyyen üzre bi’l-vekâle cârî ve sâdır olan ikrârını vekîl-i âhar Mehmed Beşe vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene hamsin ve sittîn ve elf. Şuhûdü’l-hâl: El-Hâc Mehmed b. Ömer, Dilâver Bey b. Abdullah, Mehmed Efendi b. İbrahim, Abdi Efendi b. Ömer, Mustafa Beşe b. Hasan