Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 108 Hüküm no: 90 Orijinal metin no: [17b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Sefer’in Gürcü asıllı câriyesini azat ettiği Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i kebîr mahallesi sâkinelerinden Fâtıma bt. Sefer nâm hâtun kıbelinden husûs-ı âti’l-beyânı ikrâra vekîli olup mezbûrenin zâtını ma‘rifet-i şer‘iyye ile ârifân olan Yusuf Beşe b. Abdullah ve Memi Beşe b. Mehmed şehâdetleriyle şer‘an vekâleti sâbite olan fahrü’l-eşbâh Mehmed Çelebi b. Abdülbâkī nâm vekîl meclis-i şer‘-i şerîf-i enverde rıkkına mu‘terife olup müvekkile-i merkūmenin câriye-i memlûkesi olan işbu orta boylu kara kaşlı kara gözlü Gürciyyetü’l-asl Timurhan bt. Abdullah muvâcehesinde bi’l-vekâle ikrâr-ı tâm ve takrîr-i kelâm edip câriye-i mevsûfe-i merkūmeyi târih-i kitâbdan üç yüz altmış gün tamâmına değin bana hizmet edip müddeti tamâm oldukda sâir ahrâr-ı asliyyât gibi hürre olmak üzre mezbûre Timurhan’ı kitâbete kesdim bundan sonra câriye-i mevsûfe-i mezbûre hizmet-i mersûmeyi edâ eyledikde sâir ahrâr-ı asliyyât gibi hürre olsun dedi dedikde vekîl-i mezbûr Mehmed Çelebi’nin minvâl-i meşrûh üzre cârî ve sâdır olan kelimât-ı meşrûhasını câriye-i mevsûfe-i merkūme bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’l-ibtigā ketb olundu. Fî 26 min Ramazân li sene 1065. Şuhûdü’l-hâl: İsmail Beşe b. Muharrem, Ali Beşe b. Mustafa, Hüseyin Beşe [b.] Ali, Bayram Dede b. Mehmed, Abdi Beşe b. İskender ve gayruhüm mine’l-hâzırîn