Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 108 Hüküm no: 91 Orijinal metin no: [17b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia bt. Ali’nin mülk menzilini Hamza Çavuş Vakfı ile Mustafa Çavuş Vakfı’na bey‘ bi’l-istiğlâl yoluyla sattığı Medîne-i Hazret-i Ebâ Eyyûb el-Ensârî -dâme [fî] rıdvâni’l-Bârî-’de Nişâncı Paşa mahallesi sâkinelerinden Râbia bt. Ali nâm hâtun meclis-i şer‘-i şerîf-i lâzımü’t-tevkīrde medîne-i merkūmede merhûm Hamza Çavuş Vakfı ile Mustafa Çavuş vakf eylediği nukūda bi’l-fi‘il mütevellî olan işbu râfi‘ü’l-kitâbi’l-müstetâb fahrü’ş-şüyûh Mehmed Efendi b. Ramazan mahzarında bi tav‘ihâ ikrâr ve i‘tirâf edip silk-i mülkümde münselik olup mahalle-i merkūmede vâki‘ iki tarafdan Abdülbâkī mülkü ve bir tarafdan Ahmed Efendi mülkü ve bir tarafdan tarîk-i âm ile mahdûd mülk menzilimi cemî‘ tevâbi‘ ve levâhıkı ile mütevellî-i merkūm Mehmed Efendi’ye bi tarîki’l-istiğlâl beş bin nakd-i râyic fi’l-vakt akçeye ki bi hesâb-ı riyâlî elli sekiz guruş ile üç rub‘a bey‘ ve teslîm edip ol dahi vech-i muharrer üzre vakfeyn-i mezbûreyn mâlıyla iştirâ ve tesellüm ve kabz ve kabûl eyleyip semeni olan mez[bû]ru’n-na‘t beş bin akçeyi mütevellî-i mezbûr yedinden tamâmen ahz ü kabz eylediğimden yine menzi[l-i] mahdûd-ı mezkûru mütevellî-i mezbûr Mehmed Efendi ba‘de’t-tahliyeti’ş-şer‘iyye târih-i kitâb şehri gurresinden üç sene tamâmına değin beher sene yedişer yüz ellişer akçeden cem‘an iki bin iki yüz elli akçe icâre ile bana îcâr ve teslîm ben dahi vech-i mübeyyen üzre istîcâr ve tesellüm ve kabûl eyledim dedikde gıbbe’t-tasdîk-i şer‘î yine mukırra-i mezbûrenin vâlidesi Fâtıma bt. Muslu nâm hâtun ile li ebeveyn er karındaşı Abdurrahman nâm kimesne mütevellî-i mezbûr mahzarında her biri ikrâr ve takrîr-i kelâm edip menzi[l-i] mahdûd-ı mezkûrun derkine ve ücret-i merkūmeye tarafeynden emr ve kabûlü hâvî kefâlet-i sahîh[a]-i şer‘iyye ile kefîl olduk dediklerinde mâ hüve’l-vâki‘ bi’l-ibtigā ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Mustafa Efendi el-Müderris, Mehmed Efendi b. Hasan el-İmâm, Ali Çelebi b. Himmet, Mustafa b. Mehmed el-Müezzin, Bayram Halîfe b. Ebîbekir el-Müezzin, Mehmed Dede el-Kayyım, Mustafa Efendi b. Abdullah, Mehmed Çelebi el-Attâr, Mustafa Halîfe el-Müezzin