Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 109 Hüküm no: 92 Orijinal metin no: [17b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rayko v. Duka’nın mülk bağını Dimo’ya sattığı Vilâyet-i Rumeli’nde Filorine kazâsına tâbi‘ Şirzeka nâm karye sâkinlerinden Rayko v. Duka nâm zimmî meclis-i şer‘-i [şerîf-i] lâzımü’t-tevkīrde işbu râfi‘ü’l-vesîka Dimo v. Güre? nâm zimmî muvâcehesinde bi’t-tav‘i’s-sâ[f] ikrâr ve i‘tirâf edip silk-i mülk-i sahîhimde münselik olup karye-i mezbûrede vâki‘ etrâf-ı erba‘adan Yeno v. Yuvaniç ve Rumana nâm zimmîler mülkleri ve tarîk-i âm ile mahdûd ve mümtâz tahmînen bir buçuk dönüm bir kıt‘a mülk bağımı merkūm Dimo’ya bin beş yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i meşrûh üzre iştirâ ve kabûl eyleyip semeni olan mezbûru’n-na‘t bin beş yüz akçeyi mersûm Dimo yedinden tamâmen ahz ü kabz eylediğimden sonra mebî‘-i mahdûd-ı mezkûru mahallinde zabt ve tasarrufa merkūm Dimo’yu tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fî 28 min Ramazâni’l-mübârek li sene 1065. [18a] Şuhûdü’l-hâl: Mustafa Beşe b. Abdullah, Dilâver Beşe b. Abdullah, Hüseyin Çelebi b. Ali, Abdullah Beşe b. İskender, Kiro, İstati, Tarika, Milo, Metro, Nikola ve gayruhüm mine’l-hâzırîn