Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 110 Hüküm no: 93 Orijinal metin no: [18a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todoraki v. Yani’nin mülk menzilini Yanaki v. Dimitri’ye sattığı Mahrûse-i Kostantıniyye hısn-ı ebvâbından Fener Kapısı hâricinde Abdi Subaşı mahallesi sâkinlerinden Todoraki v. Yani nâm zimmî meclis-i [şer‘-i] şerîf-i lâzımü’t-tevkīrde işbu râfi‘ü’l-vesîka Yanaki v. Dimitri nâm zimmî muvâcehesinde bi tav‘ihî ikrâr ve i‘tirâf edip silk-i mülkümde münselik olup mahmiye-i Edirne ihtivâsından Ada nâhiyesine tâbi‘ Karaağaç nâm karyede vâki‘ bir tarafı Hasan Bey b. Abdullah mülkü ve bir tarafdan Kosta v. Apostol mülkü ve bir tarafdan Dimo mülkü ve bir tarafdan tarîk-i âm ile mahdûd bir bâb fevkānî odayı ve sofayı ve altında ahırı ve su kuyusunu ve zât-ı eşcâr-ı müsmire ve gayr-ı müsmire bahçeyi müştemil mülk menzilimi cemî‘ tevâbi‘ ve levâhıkı ile mezbûr Yanaki’ye on iki bin cedîd akçeye tarafeynden îcâb ve kabûlü hâvî bey‘-i bâtt-ı kat‘î ile bey‘ edip ol dahi vech-i muharrer üzre iştirâ ve kabûl eyleyip semeni olan mezbûru’n-na‘t on iki bin akçeyi merkūm Yanaki yedinden tamâmen ahz ü kabz eylediğimden sonra zikr olunan menzilimi mahallinde zabt ve tasarrufa merkūm Yanaki’yi tarafımdan taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’l-ibtigā ketb olundu. Fî 28 min Ramazâni’l-mübârek li sene 1065. Şuhûdü’l-hâl: Abdi Beşe b. İskender, Dilâver Beşe b. Abdullah, Hüseyin Çelebi b. Ali, Bayram Sofu b. Mehmed ve gayruhüm mine’l-hâzırîn