Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 110 Hüküm no: 94 Orijinal metin no: [18a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ölen Trandafilo v. Yani’nin menzilinin borçları nedeniyle vârisleri tarafından yine vârislerinden Todori’ye devri Havâss-ı aliyye kazâsına tâbi‘ kasaba-i Çatalca’da Papaz Adniyos? nâm mahalle s[â]ki[n]lerinden iken bundan akdem hâlik olan Trandafilo v. Yani nâm nasrânînin verâseti zevce-i metrûkesi Marola bt. Piyo? nâm nasrânîye ile helâkinden sonra şeref-i İslâm ile müşerref olan sulbî kebîr oğlu Mustafa nâm mühtediye ve sulbiye kebîre kızı Ferşeni nâm nasrânîye ile evlâd-ı sulbiyesi Todori ve Hırsa Kovso? nâm zimmîlere münhasıra olduğu şer‘an zâhir ve müte‘ayyin oldukdan sonra merkūmûn Mustafa ve Hırsa Kovso? asâleten ve mersûme Marola ve ....? ve tarafından asîl ve sadriye kebîr[e] kızı merkūme Ferşeni tarafından husûs-ı âti’z-zikre vekîl olup Dimitri v. Zografo ve Rizo v. İstemad nâm zimmîler şehâdetler[i] ile şer‘an vekâleti sâbite oldukdan sonra vekâleten meclis-i şer‘-i şerîf-i lâzımü’t-tevkīrde işbu râfi‘ü’l-vesîka mersûm Todori muvâcehesinde her biri asâleten ve vekâleten ikrâr ve i‘tirâf edip mûrisimiz hâlik-i mezbûrun metrûkâtından olup mahalle-i merkūmede vâki‘ bir tarafdan Yorgi ve bir tarafdan Todori mülkü ve bir tarafdan Yani mülk[ü] ve taraf-ı râbi‘i tarîk-i âm ile mahdûd bir bâb fevkānî odayı ve altında ahırı ve havluyu müştemil olan mülk menzil hâlik-i merkūmun mülkü olmağın zarûret-i deyni için bey‘ olmak lâzım gelmeğin biz dahi asâlet ve vekâletimiz hasebiyle menzil-i mezkûrda olan hisse-i şâyi‘amızı mezbûr Todori’ye taraf[eyn]den îcâb ve kabûlü hâvî bey‘-i bâtt-ı kat‘î ile altı bin cedîd akçeye bey‘ edip kabz-ı semen ve teslîm-i mebî‘ eyledik ba‘de’l-yevm menzil-i mahdûd-ı mezkûrda vechen mine’l-vücûhi’ş-şer‘iyye alâka ve medhalimiz kalmadı mersûm Todori’nin irsen ve şirâ’en mülk-i mahzı ve hakk-ı sırfı olmuşdur keyfemâ yeşâ ve yehtâr mutasarrıf olsun dediklerinde mukırrûn-ı mezbûrûnun bi’l-asâle ve bi’l-vekâle cârî ve sâdır olan ikrârlarını el-mukarru lehü’l-merkūm Todori vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’s-sâmin ve’l-ışrîn min şehri Ramazâni’l-mübârek li sene hamsin ve sittîn ve elf. Şuhûdü’l-hâl: Veli Beşe [b.] Ali, Hasan Beşe b. Yayla?, Mustafa Beşe b. Abdullah, Abdullah Beşe b. İskender, Bayram Dede [b.] Mehmed ve gayruhüm mine’l-hâzırîn