Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 111 Hüküm no: 95 Orijinal metin no: [18b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Harsafo? bt. Dimo’nun tasarrufundaki vakıf mumhânenin dörtte bir hissesini Yorgo v. Dimo’ya devrettiği Vilâyet-i Rumeli’nde Yenişehir kazâsı ihtivâsından Fenar nâhiyesine tâbi‘ Mirbalo nâm karye sâkinelerinden Harsafo? bt. Dimo nâm nasrâniyenin zevci ve tarafından husûs-ı âti’z-zikre vekîli olup mezbûreyi ârifân olan Dimoli v. Hırito ve diğer Dimo ve İskarlet nâm zimmîler şehâdetleriyle şer‘an vekâleti sâbite olan Papa Polezo? v. Aleksi nâm nasrânî meclis-i şer‘-i şerîf-i lâzımü’t-tevkīrde işbu râfi‘ü’l-vesîka Yorgo v. Dimo nâm zimmî muvâcehesinde bi’l-vekâle ikrâr-ı tâm ve takrîr-i kelâm edip merhûm ( ) Vakfı’ndan olup müvekkile-i merkūmenin icâre-i mu‘accele-i ma‘lûme ve ücret-i müeccele ile taht-ı tasarrufunda olup mahrûse-i Galata hısnı ebvâbından Kalora? Kapısı hâricinde vâki‘ bir tarafdan hisar duvarı ve bir tarafdan sâhil-i bahr ve iki tarafdan merhûm Haydar Paşa Vakfı’ndan Anderon ve Franko nâm zimmîler tasarruflarında olan dükkânlar ile mahdûd ve mümtâz bir kıt‘a şem‘hâne dört sehim olup bir sehim hisse-i şâyi‘asını zevcem müvekkile-i mersûme bundan akdem merkūm Yorgo’ya altı bin beş yüz cedîd akçe bedel mukābelesinde ma‘rifet-i mütevellî ile tefvîz bi’l-ferağ edip ol dahi tefevvuz ve kabûl eyledikden sonra hakk-ı ferağ olan meblağ-ı mezbûr altı bin beş yüz akçenin beş bin beş yüz akçesini mukaddemâ merkūm Yorgo yedinden müvekkile-i mezbûre kabz etmişidi, hâlen meblağ-ı bâkī bin akçeyi dahi vekâlet-i mahkiyem hasebiyle mezbûr Yorgo yedinden ahz ü kabz eyledim, ba‘de’l-yevm zikr olunan şem‘hâneden dört sehimden bir sehim hissede zevcem müvekkile-i mezbûrenin vechen mine’l-vücûhi’ş-şer‘iyye alâkası yokdur, mersûm Yorgo emsâli tasarrufu gibi tasarruf eylesin dedikde, vekîl-i mezbûrun vech-i mübeyyen üzre cârî ve sâdır olan ikrârını merkūm Yorgo vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fî 29 min Ramazâni’l-mübârek li sene 1065. Şuhûdü’l-hâl: Abdullah Beşe b. İskender, Mehmed Efendi el-Kadı, Abdullah Efendi el-Kadı, Hüseyin Çelebi b. Ali ve gayruhüm mine’l-hâzırîn Franko, Todori, Todoraki, Yani, Duka, Dimitri, Yani, Hıristo, Yani, Hıristo, Angeli, Yani, Androya, Todori, Aleksi ve Yorgi veledey Paroş, Esteryanoz, Armağan