Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 112 Hüküm no: 96 Orijinal metin no: [18b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin Çelebi b. Mustafa’nın Osman Çelebi’deki alacağının bir kısmını kefili Mehmed b. Osman’dan tahsil ettiği ve kalanını talep ettiği Medîne-i Hazret-i Eyyûb el-Ensârî -dâme fî rıdvâni’l-Bârî-’de Câmi‘-i kebîr mahallesi sükkânından işbu râfi‘ü’l-kitâb Hüseyin Çelebi b. Mustafa nâm kimesne meclis-i şer‘-i şerîf-i enverde Mehmed b. Osman nâm kimesne üzerine da‘vâ ve takrîr-i kelâm edip gāib ani’l-meclis Osman Çelebi b. ( ) nâm kimesne zimmetinde evsâfı ve cinsi beynimizde ma‘lûm ( ) nâm câriye bahâsından yedi bin beş yüz akçe hakkım olup mezbûr Mehmed meblağ-ı merkūma kefîl bi’l-mâl olmağla bundan akdem beş bin akçesin mezbûr Mehmed yedinden tamâmen ahz ü kabz edip meblağ-ı bâkī iki bin beş yüz akçeyi hâlen taleb eylediğimde edâdan imtinâ‘ eder suâl olunsun dedikde gıbbe’s-suâl ve akībe’l-inkâr müdde‘î-i mezbûr Hüseyin Çelebi’den da‘vâsını mübeyyine beyyine taleb olundukda udûl-i müslimînden olup mahalle-i mezbûre sâkinlerinden Mustafa Beşe b. Mehmed ve Ali Beşe b. Murtaza nâm kimesne meclis-i şer‘a li ecli’ş-şehâde hâzırân olup istişhâd olunduklarında fi’l-hakīka müdde‘î-i mezbûrun gāib-i merkūm zimmetinde yedi bin beş yüz akçe hakkına mersûm Mehmed kefîl bi’l-mâl oldu biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tenkîr şehâdetleri makbûle ve mesmû‘a olmağın mûcebiyle meblağ-ı merkūm bâkī iki bin beş yüz akçeyi müdde‘î-i mezbûra edâ ve teslîme merkūm Mehmed’e tenbîh birle mâ vaka‘a bi’t-taleb ketb olundu. Fi’l-yevmi’r-râbi‘ min Şevvâli’l-mükerrem li sene hamsin ve sittîn ve elf. Şuhûdü’l-hâl: Fahrü’l-kuzât Mehmed Efendi b. Habil?, Abdi Efendi b. Mehmed el-Kadı, Dilâver Beşe b. Abdullah, Bayram b. Mehmed