Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 115 Hüküm no: 101 Orijinal metin no: [19b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Osman b. Mehmed ile Mehmed b. Ahmed’in Ali’yi değnek ve yumruk ile darb ettikleri Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de merhûm Baba Haydar mahallesi sâkinlerinden işbu râfi‘ü’l-vesîka Ali b. ( ) nâm kimesne meclis-i şer‘-i şerîf-i lâzımü’t-teşrîfde Osman b. Mehmed ve Mehmed b. Ahmed nâm kimesneler muvâcehelerinde üzerlerine da‘vâ ve takrîr-i kelâm edip târih-i kitâbdan bir gün mukaddem ben kendi hâlimde gelirken merkūmân Osman ve Mehmed bi gayr-ı vech-i şer‘î başıma ve omuzlarıma ve arkama değnek ve yumruk ile darb edip beni mecrûh etmişlerdir suâl olunup mûceb-i şer‘îsi icrâ olunmak matlûbumdur dedikde gıbbe’s-suâl ve akībe’l-inkâr müdde‘î-i mezbûr Ali’den müdde‘âsını mübeyyine beyyine taleb olundukda udûl-i ricâlden olup sâlif Baba Haydar mahallesi sâkinlerinden Süleyman Çelebi b. Ali ve Mehmed b. Ali ve el-Hâc Halil b. Mehmed nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka merkūmân Osman ve Mehmed târih-i kitâbdan bir gün mukaddem müdde‘î-i mezbûr Ali’yi değnek ile ve muşt ile başına ve omuzlarına ve arkasına bizim huzûrumuzda darb-ı şedîd ile darb etmişleridi, biz bu husûsa minvâl-i meşrûh üzre şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle ve mesmû‘a olup ba‘dehû mezbûrun başına ve omuzlarına nazar olundukda fi’l-vâki‘ değnek ve yumruk darbından kara ve bere olduğu dahi müşâhede ve mu‘âyene olunup mâ hüve’l-vâki‘ bi’l-ibtigā ketb olundu. Fî 5 min Şevvâli’l-mükerrem li sene 1065. Şuhûdü’l-hâl: es-Seyyid Mehmed Çelebi b. Ahmed, eş-Şeyh Abdullah Efendi b. İsa, Hüseyin Çelebi b. Cafer, Veli Bey b. Ramazan, Ahmed Çelebi b. Hasan, Mustafa Beşe b. Mehmed, Mehmed Çelebi b. Veli, Mehmed Bey b. Ali el-Cündî, Ali Efendi b. Ahmed, Yusuf Efendi b. Abdülbâkī, Mehmed Çelebi b. Turâbî ve gayruhüm mine’l-hâzırîn