Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 116 Hüküm no: 102 Orijinal metin no: [19b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ömer b. Rıdvan’ın evinden Habib b. İlyas tarafından muhtelif eşya ve parasının çalındığı iddiasını ispatlayamadığı Havâss-ı refî‘a kazâsına tâbi‘ Kadı Yakublu demekle ma‘rûf karye sükkânından Ömer b. Rıdvan nâm kimesne meclis-i şer‘-i şerîf-i enver ve mahfil-i dîn-i münîf-i ezherde işbu hâmilü’l-vesîka Habib b. İlyas nâm kimesne mahzarında üzerine da‘vâ ve takrîr-i kelâm edip mezbûr Habib târih-i kitâbdan iki ay mukaddem karye-i mezbûrede vâki‘ menzilimden bir top bez ve bir gömlek ve dokuz aded makrama ve bin nakid akçemi serika eylemişdir, hâlen suâl olunsun dedikde gıbbe’s-suâl ve akībe’l-inkâr müdde‘î-i mezbûr Ömer’den da‘vâsını mübeyyine beyyine taleb olundukda ikāmet-i beyyineden izhâr-ı acz edip istihlâf etmeğin fi’l-hakīka müdde‘î-i mezbûr Ömer’in menzilinden minvâl-i mübeyyen üzre bir top bez ve bir gömlek ve dokuz makrama ve bin akçesini serika eylemediğine merkūm Habib’e yemîn teklîf olundukda ol dahi alâ vefki’l-mes’ûl yemîn billâhi te‘âlâ etmeğin mûcebiyle müdde‘î-i mezbûr Ömer bî-vech mu‘ârazadan men‘ olunup mâ hüve’l-vâki‘ bi’l-ibtigā ketb olundu. Fi’l-yevmi’l-hâmis min şehri Şevvâli’l-mu‘azzam sene 1065. Şuhûdü’l-hâl: Selim Bey b. İskender, Halil Beşe b. İsmail, Mustafa b. Mehmed, Mehmed Beşe b. Abdullah