Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 117 Hüküm no: 104 Orijinal metin no: [20a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe ile Ahmed Beşe’nin Boğdan adlı zimmîdeki koyun bedelinden alacaklarını tahsil için açtıkları davada sulh oldukları Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de sütçü tâ’ifesinden Mehmed Beşe b. Abdullah ve Ahmed Beşe b. Abdullah nâm kimesneler meclis-i şer‘-i şerîf-i lâzımü’t-teşrîfde işbu hâmilü’s-sifri’ş-şer‘î Boğdan v. Mahsum nâm nasrânî muvâcehesinde her biri bi’t-tav‘ ve’l-ihtiyâr lâ-bi’l-kerh ve’l-icbâr ikrâr-ı tâm ve takrîr-i kelâm edip mezbûr Boğdan zimmetinde adedi beynimizde ilm-i şer‘î ile ma‘lûm yedimizden müşterâ ve makbûz koyun semeninden otuz bin cedîd akçe hakkımız olup mukaddemâ meblağ-ı mezbûru mesfûr Boğdan’dan da‘vâ ve taleb eylediğimizde mezbûr Boğdan meblağ-ı merkūmu def‘aten edâya iktidârı olmamağla beynimizde münâza‘ât-ı kesîre cereyânından sonra hâlen vesâtat-i muslihîn ile meblağ-ı mezbûrdan bizi an ikrâr yirmi altı bin akçe üzerine inşâ’-i akd-i sulh eylediklerinde biz dahi sulh-ı mezbûru kabûl ve bedel-i sulh olan meblağ-ı mezbûr mukābelesinde beher re’si yüz akçe olmak üzre cem‘an iki yüz altmış re’s koyun merkūm Boğdan’ın kendi mülkü olmağla yedinden tamâmen ahz ü kabz edip meblağ-ı mâ‘adâ da‘vâsından zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik ba‘de’l-yevm mezbûr Boğdan zimmetinde bir akçe ve bir habbe hakkımız bâkī kalmamışdır dediklerinde mukırrân-ı mezbûrânın minvâl-i mübeyyen üzre cârî ve sâdır olan ikrârlarını merkūm Boğdan bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ min Şevvâli’l-mu‘azzam min şuhûri sene hamsin ve sittîn ve elf. Şuhûdü’l-hâl: Mehmed Efendi b. Habil, Mehmed Beşe b. Mustafa, Ali Beşe b. Pîrî, Mehmed Beşe b. Hasan ve gayruhüm