Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 118 Hüküm no: 105 Orijinal metin no: [20a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şahin v. Ergiri’nin ortağı olan Yusuf b. Ahmed’e sermaye olarak para verdiğinin tesbiti Keresteci tâ’ifesinden işbu hâmilü’s-sifri’ş-şer‘î Şâhin v. Ergiri nâm zimmî meclis-i şer‘-i şerîf-i lâzımü’t-teşrîfde yine tâ’ife-i mezbûreden olup bundan akdem fevt olan Yusuf b. Ahmed nâ[m] müteveffânın zâhirde vâris-i ma‘rûfu olmamağla muhallefâtının selâse erbâ‘ına vâzı‘ü’l-yed olan beytülmâl-i âmme ve hâssa emîni olan Ahmed Çelebi b. Mehmed nâm kimesne muvâcehesinde üzerine da‘vâ ve takrîr-i kelâm edip müteveffâ-yı mezbûr Yusuf ile zikr olunan kerestecilik san‘atında şirket-i vücûh vechi üzre şerîkler olmağla hâl-i hayâtında alâ tarîki’s-sermâye yedine yirmi beş bin cedîd akçe teslîm ol dahi vech-i muharrer üzre kabz ve tesellüm, lâkin kable’l-edâ fevt olmağla zimmetinde kalmışidi hâlen muhallefât-ı vâfiyesinden taleb ederin, suâl olunup teslîme emîn-i mezbûra tenbîh olunmak matlûbumdur dedikde gıbbe’s-suâl emîn-i mezbûr cevâbında müteveffâ-yı mezbûrun vech-i muharrer üzre muhallefâtının selâse erbâ‘ına vaz‘-ı yed eylediğini ikrâr lâkin müteve[ff]â-yı mezbûr ile şerîkler olup cihet-i sermâyeden meblağ-ı mezbûr zimmetinde olduğunu münkir olıcak müdde‘î-i mezbûr Şâhin’den da‘vâsına mutâbık beyyine taleb olundukda udûl-i ricâlden olup tâ’ife-i mezbûre kethüdâsı olan Rıdvan Kethüdâ b. Abdullah ve yiğitbaşıları el-Hâc Mehmed b. Mehmed nâm kimesneler li ecli’ş-şehâde hâzırân olup istişhâd olunduklarında fi’l-vâki‘ müdde‘î-i mezbûr ile müteveffâ-yı merkūm bundan akdem beynlerinde akd-i şirket eylediklerinde müdde‘î-i mezbûr müteveffâ-yı merkūm Yusuf’a hâl-i hayâtında ve kemâl-i akl ve sıhhatinde vech-i muharrer üzre yirmi beş bin akçe teslîm merkūm Yusuf dahi bizim huzûrumuzda kabz etmişidi, biz bu husûsa şâhidleriz şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle oldukdan sonra meblağ-ı mezbûru müteveffâ-yı merkūm yedinden hâl-i sıhhatinde küllen ve ba‘zan ahz ü kabz veya hibe veya havâle veyâhud taraf-ı şer‘iyyeden bir vechile zimmetini ibrâ ve iskāt eylemediğine müdde‘î-i merkūm Şâhin’e yemîn teklîf olundukda yemîn billâhi’llezî enzele’l-İncîle alâ İsâ -aleyhi’s-selâm- etmeğin mûcebiyle ba‘de’l-hükm mâ vaka‘a bi’t-taleb ketb olundu. Fî Şevvâli’l-mükerrem sene 1065. Şuhûdü’l-hâl: Mustafa Efendi b. Hüseyin el-muharrirü’l-vesîka, Mehmed Efendi b. Nasuh, diğer Mehmed Efendi b. en-Nâib min kabl, Hüseyin b. Ali, Abdullah Beşe b. İskender