Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 119 Hüküm no: 106 Orijinal metin no: [20b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Papa İsterati’nin mülk menzilini Dedo’ya sattığı, bedelin bir kısmını daha önce satın aldığı evin bedeline saydıkları ve kalan miktarın ödendiği Vilâyet-i Rumeli’nde Ergirikasrı kazâsına tâbi‘Yokava demekle ma‘rûf karye sâkinlerinden Papa İsterati v. Papa Sava nâm nasrânî meclis-i şer‘-i şerîf-i lâzımü’t-teşrîfde işbu hâmilü’s-sifri’ş-şer‘î Dedo v. Hıslo nâm zimmî muvâcehesinde bi tav‘ihî ikrâr ve i‘tirâf edip karye-i merkūmede vâki‘ bir tarafı Dedo v. Göni nâm nasrânî mülkü ve bir tarafı Koçu v. Gön? nâm zimmî mülkü ve iki tarafı tarîk-i âm ile mahdûd olup iki bâb fevkānî odaları ve bir kuleyi ve havluyu müştemil olan mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mesfûr Dedo’ya tarafeynden îcâb ve kabûlü hâvî bey‘-i kat‘î ile on bin cedîd akçeye bâtten bey‘ ve teslîm ol dahi minvâl-i muharrer üzre iştirâ ve kabûl eyleyip semen-i mezkûrun yedi bin akçesini hudûdu beynimizde ilm-i şer‘î ile ma‘lûm olup bundan akdem bana bey‘ eylediği menzil bahâsından zimmetinde olan yedi bin akçe hakkı ile takas ol dahi mukāssa ve kabûl eyleyip semen-i bâkī üç bin akçeyi dahi mesfûr Dedo yedinden tamâmen ahz ü kabz eyledikden sonra [me]bî‘-i mahdûd-ı mezkûru mahallinde zabt ve tasarrufa merkūm Dedo’yu taslît eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fî Şevvâli’l-mu‘azzam li sene hamsin ve sittîn ve elf. Şuhûdü’l-hâl: Hüseyin Beşe b. Ali, Bayram Dede b. Mehmed, Abdi Beşe b. İskender, Dilâver b. Abdullah Kosta, Mirka, Koçi, Göni, Değarina, Sino, Hakasine