Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 119 Hüküm no: 107 Orijinal metin no: [20b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Mustafa’nın mülk bahçesini Muslu Bey b. Hüseyin’e sattığı Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Cebecibaşı mahallesi sükkânından Mehmed Bey b. Mustafa nâm kimesne meclis-i şer‘-i şerîf-i lâzımü’t-teşrîfde işbu râfi‘ü’l-kitâb hâssa helvacılardan Muslu Bey b. Hüseyin nâm kimesne mahzarında ikrâr ve i‘tirâf edip silk-i mülk-i sahîhimde münselik olup mahalle-i mezbûrede vâki‘ bir tarafdan Yusuf Çelebi b. el-Hâc Osman mülkü ve bir tarafdan mekābir-i müslimîn ve bir tarafdan tarîk-i âm ve bir tarafdan tarîk-i hâs ile mahdûd ve mümtâz olup iki kıt‘a su kuyusunu ve zât-ı eşcâr-ı müsmire ve gayr-ı müsmireyi ve havluyu müştemil olan mülk bahçemi mezbûr Muslu Bey’e tarafeynden îcâb ve kabûlü hâvî bey‘-i bâtt-ı sahîh-i şer‘î ile üç yüz kıt‘a riyâlî guruşa bey‘ ve teslîm ol dahi minvâl-i muharrer üzre iştirâ ve tesellüm ve kabûl ve kabz eyledikden sonra semen-i mezbûru müşterî-i merkūm yedinden bi’t-tamâm ahz ü kabz eyledim ba‘de’l-yevm zikr olunan bahçede vechen mine’l-vücûhi’ş-şer‘iyye ve esbâbi’l-mer‘iyye benim alâka ve medhalim yokdur, mezbûr Muslu Bey’in mülk-i müşterâsı olmuşdur keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sâmin min Şevvâli’l-mükerrem li sene hamsin ve sittîn ve elf. Şuhûdü’l-hâl: El-Hâc Receb Efendi b. Ali el-İmâm, Ahmed Efendi b. Mehmed el-İmâm, Mustafa Halîfe b. Ramazan el-Müezzin, Murad Beşe b. Mehmed er-Râcil, Yusuf Çelebi ve Ramazan ibney el-Hâc Osman, Ahmed Efendi b. Hasan, Yunus Beşe b. Murad, İbrahim Beşe b. Yusuf ve gayr