Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 128 Hüküm no: 120 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Mahmud’un eski zevcesi Emine bt. Hızır’a emânet verdiği eşyalar ile parayı alması gerektiği İşbu hâmilü’l-kitâb Hüseyin b. Mahmud nâm kimesne meclis-i şer‘-i şerîf-i lâzımü’t-tevkīrde sâbıkan zevcesi olan Emine bt. Hızır nâm [hâ]tun mahzarında üzerine da‘vâ ve takrîr-i kelâm edip mezbûre Emine mukaddemâ zevcem olup ben âhar diyâra gitmek iktizâ ettikde emlâkimden üç aded beledî döşek ve üç aded beledî yorgan ve üç aded kilim ve bir mısır hasırı ve altı aded beledî yastık ve iki sahan ve bir tencere ve on yedi aded sîm baftalı bir raht kuşak ile yirmi beş kıt‘a riyâlî guruşumu mezbûre Emine’nin yedine alâ tarîki’l-vedî‘a vaz‘ ve teslîm ol dahi vech-i muharrer üzre kabz ve tesellüm eylemişidi, hâlen eşyâ-i merkūm ile meblağ-ı mezbûru taleb ederin suâl olunsun dedikde gıbbe’s-suâl mezbûre Emine Hâtun cevâbında fi’l-hakīka mezbûr Hüseyin mukaddemâ zevcim olup minvâl-i meşrûh üzre eşyâ-i mersûm ile meblağ-ı merkūm yirmi beş guruşu bana teslîm ben dahi kabz ve tesellüm etmişidim deyû bi tav‘ihâ ikrâr ve i‘tirâf etmeğin ikrârı mûcebince eşyâ-i mezbûr ile meblağ-ı mezbûru mezkûr Hüseyin’e edâ ve teslîme merkūme Emine’ye tenbîh birle mâ vaka‘a bi’l-ibtigā ketb olundu. Fi’l-yevmi’s-sâdis aşer min Şevvâli’l-mükerrem li sene hamsin ve sittîn ve elf. Şuhûdü’l-hâl: Mustafa b. Cafer, Mehmed b. Abdullah, Mahmud Beşe çukadâr, Abdi Beşe el-Muhzır, Hüseyin Beşe b. Ali