Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 129 Hüküm no: 121 Orijinal metin no: [23a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ahmed Çavuş’un vefat eden babası Osman Çavuş b. Abdülbâki’den intikal eden menzildeki hissesini Kiremitçi Süleyman Evkâfı’na bey‘ bi’l-istiğlâl yoluyla sattığı Medîne-i Ebâ Eyyûb el-Ensârî -razıye anhü rabbühü’l-Melikü’l-Bârî-de Serv mahallesi sâkinlerinden olup bundan akdem fevt olan Osman Çavuş b. Abdülbâkī nâm müteveffânın verâseti zevce-i metrûkesi Âişe b. Abdülmennân nâm hâtun ile sulbî kebîr oğlu Ahmed Çavuş ve sulbiye kızı sagīre kızı Mü’mine’ye münhasıra olduğu ve menzil-i câ’i’z-zikr beynlerinde iktisâm olundukda merkūmûnun tashîh-i mes’eleleri yirmi dört sehimden farz olunup sihâm-ı merkūmeden üç sehim mersûme Âişe Hâtun’a ve yedi sehmi mezbûre Mü’mine’ye ve on dört sehmi müşârun-ileyh Ahmed Çavuş’a bi hasebi’l-irsi’ş-şer‘î isâbet ve intikāl eylediği hâkim-i muvakkı‘-ı kitâb -tûbâ lehû ve hüsnü me’âb- huzûrunda zâhir ve müte‘ayyin oldukdan sonra merkūm Ahmed Çavuş meclis-i şer‘-i şerîf-i lâzımü’t-teşrîfde medîne-i mezkûrede merhûm Kiremitçi Süleyman Evkāfı’na meşrûtiyet üzre bi’l-fi‘il mütevellî olan fahrü’l-eşbâh Mehmed Çelebi b. Ahmed nâm mütevellî mahzarında ikrâr-ı tâm ve takrîr-i kelâm edip müteveffâ-yı mezbûrun muhallefâtından olup mahalle-i merkūmede vâki‘ [23b] etrâf-ı erba‘ası es-Seyyid Mehmed Çelebi ve ( ) mülkleri ve tarîk-i âm ile mahdûd olup fevkānî ve tahtânî büyût-i müte‘addideyi ve iki sofa ve bir matbah ve bir ahırı ve bi’r-i mâ ve hadîkayı ve kenîfi müştemil olan mülk-i mevrûs menzilden bâlâda mastûr olan hisse-i ma‘hûde-i müfrezemi mütevellî-i merkūm Mehmed Çelebi’ye doksan dört kıt‘a riyâlî guruş-ı kebîre bi tarîki’l-istiğlâl bey‘ ve teslîm ol dahi mâl-ı vakf-ı mezbûr ile iştirâ ve tesellüm ve kabûl eyleyip semen-i merkūm doksan dört guruşu mütevellî-i mersûm Mehmed Çelebi yedinden tamâmen ahz ü kabz eylediğimden sonra yine mütevellî-i müşârun-ileyh menzil-i mahdûd-ı mezkûrdan ifrâz olunan hisse-i mu‘ayyeneyi ba‘de’t-tahliyeti’ş-şer‘iyye târih-i kitâb şehri gurresinden üç sene tamâmına değin kırk iki buçuk guruş ve rub‘ guruş ücret ile bana îcâr ve teslîm eyledikde ben da[hi] hisse-i ma‘hûdeyi vech-i muharrer üzre istîcâr ve tesellüm ve kabz ve kabûl eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis min Şevvâli’l-mükerrem li sene hamsin ve sittîn ve elf. Şuhûdü’l-hâl: Mahmud Ağa b. Abdullah, Halil Çelebi b. Hüdâverdi, Hasan Ağa b. Hüseyin, Mustafa Çelebi b. Yusuf, Hasan Çelebi b. Mustafa, Ahmed Beşe b. Abdullah, Mehmed Efendi el-Kadı, Bereket Beşe b. Abdullah, Hüseyin b. Ali ve gayruhüm