Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 130 Hüküm no: 123 Orijinal metin no: [23b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manol v. Hıristo’nun mülk menzilini ve ortak oldukları bozahânedeki hissesini Vasil v. Duka’ya sattığı Mahmiye-i Edirne’de Yeni İmâret mahallesi sâkinlerinden olup mahrûse-i İstanbul’da bakkal tâ’ifesinden olan Manol v. Hıristo nâm nasrânî meclis-i şer‘-i hatîr-i lâzımü’t-tevkīrde hâmil-i hâze’s-sifri’ş-şer‘î Vasil v. Duka nâm nasrânî muvâcehesinde bi tav‘in sâf ikrâr ve i‘tirâf edip mahalle-i mezkûrede vâki‘ bir tarafdan Mehmed Ağa nâm kimesne mülkü ve bir tarafdan mesfûr Vasil mülkü ve bir tarafdan Ahmed Çelebi b. Abdülbâkī mülkü ve iki tarafdan tarîk-i âm ile mahdûd olup bir bâb tahtânî odayı ve bir ahırı ve bir su kuyusunu ve havluyu müştemil mülk menzil ile yine mahalle-i mezbûre sûkunda vâki‘ bir tarafdan Mehmed Çelebi b. Abdülbâkī mülkü ve bir tarafdan Osman Beşe mülkü ve iki tarafdan tarîk-i âm ile mahdûd ve mümtâz olan bir kıt‘a bozahâne alâ iştirâki’s-seviy merkūm Vasil ile mülkümüz olup hâlen sâlifü’z-zikr menzil ile bozahâneden nısf hisse-i şer‘iyye-i şâyi‘amı mezbûr Vasil zimmîye tarafeynden îcâb ve kabûlü hâvî bey‘-i bâtt-ı sahîh-i şer‘î ile iki bin beş yüz cedîd akçeye bey‘ edip ol dahi iştirâ ve kabûl eyleyip semen-i mârrü’z-zikri yedinden tamâmen ahz ü kabz eyledim dedikden sonra menzil-i mahdûd-ı mezkûr ile zikri sebk eden bozahâneden nısf hisse-i şer‘iyyeleri mahallinde zabt ve tasarrufa merkūm Vasil’i taslît eyledim min ba‘d benim alâkam yokdur ba‘de’l-yevm mecmû‘-ı menzil-i mahdûd-ı mezkûr ve mârrü’z-zikr bozahâne mersûm Vasil’in mahz-ı sarîhi olmuşdur keyfemâ yeşâ ve hasbemâ yehtâr mutasarrıf olsun dedikde gıbbe’t-tasdîk-i şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Şevvâli’l-mükerrem li sene hamsin ve sittîn ve elf. Şuhûdü’l-hâl: Ali Beşe b. Abdullah, Ali Beşe b. Abdülbâkī, Hüseyin Beşe b. Ali, Abdi Beşe b. İskender, Mustafa Beşe b. Mehmed, Yako v. Kiro, Dimitri v. Kosta ve Mili v. Dimitri