Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 132 Hüküm no: 125 Orijinal metin no: [24a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yano v. Yasko’nun amcasının oğlu Hıristo’ya muhtelif emlâktaki yarı hissesini sattığı ve tasarrufundaki arâzinin yarı hissesini devrettiği Vilâyet-i Rumeli’nde Avlonya sancağında Iskarapar kazâsına tâbi‘ Odrice nâm karye sâkinlerinden Yano v. Yasko nâm nasrânî meclis-i şer‘-i şerîf-i lâzımü’t-teşrîfde li ebeveyn ibn-i ammi hâmil-i hâze’s-sifri’ş-şer‘î Hıristo v. İlya nâm zimmî muvâcehesinde ikrâr ve i‘tirâf edip karye-i mezbûrede vâki‘ bir tarafdan Biho v. Dimo nâm zimmî mülkü ve bir tarafdan Adzegur v. Tomo nâm nasrânî mülkü ve bir tarafdan cidâr-ı kenîse ve bir tarafdan tarîk-i âm ile mahdûd iki bâb tahtânî odaları ve bir kıt‘a samanlık ve bir kıt‘a harman yerini müştemil olan menzil ile içinde mevcûd olup adedi ve mikdârı beynimizde ilm-i şer‘î ile ma‘lûm esâs-ı beyt ve evânî-i nühâsiyye ve gayr-ı nühâsiyyeden nısf hisse-i şâyi‘a-i şer‘iyyemi ve yine karye-i mezbûrede vâki‘ birinin hudûdu beynimizde ma‘lûm iki kıt‘a mülk bağlardan nısf hisse-i şâyi‘amı ve mevâzi‘-i müteferrikada olan ma‘lûmü’l-mikdâr ceviz ve dut ve armud eşcârının nısfların ve menzil-i mezbûrun kurbunda mülk eşcâr-ı gayr-ı müsmirenin nısfını bi safkatin vâhidetin mezbûr Hıristo’ya sekiz bin cedîd akçeye bey‘-i kat‘î ile bâtten bey‘ ol dahi emlâk-i merkūmenin nısflarını nefsi için vech-i muharrer üzre iştirâ ve kabûl eyledikden sonra yine karye-i mersûmede mevâzi‘-i adîdede vâki‘ ma‘lûmetü’l-hudûd ve’l-mikdâr olan arâziden mutasarrıf olduğum nısf arâzi-i ma‘lûmemi sâhib-i arz ma‘rifetiyle merkūm Hıristo’ya iki bin cedîd akçe bedel mukābelesinde tefvîz ve ferağ ol dahi vech-i mübeyyen üzre tefevvuz ve kabûl eyleyip semen-i mezbûr ile bedel-i merkūm cem‘an on bin cedîd akçeyi merkūm Hıristo yedinden tamâmen ahz ü kabz eylediğimden sonra emlâk-i merkūmenin nısflarıyla arâzi-i merkūmenin nısfını mahallinde ahz ü kabz ve zabt [24b] ve tasarrufa merkūm Hıristo’yu taslît eyledim dedikde gıbbe’t-tasdîki’ş-şer‘iyyi’l-vicâhî mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min Şevvâli’l-mükerrem li sene hamsin ve sittîn ve elf. Şuhûdü’l-hâl: Kasım Beşe b. Sinan, Ali Beşe b. Abdullah, Mehmed Beşe b. İbrahim, Ali Beşe b. Sinan, Mehmed Bey b. Hasan, Hüseyin Beşe b. Ali, Ogur, Vastadya?, Hıristo, Petro, Viço, Vaso, Mihayil, Vaso, Orgur, Bağdan?