Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 134 Hüküm no: 127 Orijinal metin no: [24b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Öldürülen İstati v. Yorgi’nin vârisleri adına vasîleri Zafiri Yorgi’nin Fazlullah Beşe’nin kâtil olduğu iddiasıyla açtığı davayı ispat edemediği ve sulh oldukları Havâss-ı Kostantıniyye -hamâha’llâhu te‘âlâ ani’l-beliyye- kazâsına tâbi‘ Küçükköy demekle ma‘rûf karye sâkinlerinden olup mukaddemâ maktûlen hâlik [olan] İstati v. Yorgi nâm hâlikin verâseti sulbî oğulları Yorgo ve Tanaş nâm sagīrlere münhasıra olduğu şer‘an zâhir ve müte‘ayyin oldukdan sonra sagīrân-ı merkūmânın tesviye-i umûrlarına kıbel-i şer‘-i şerîfden mansûb vasî olan Zafiri Yorgi nâm nasrânî meclis-i şer‘-i şerîf-i lâzımü’t-teşrîfde râfi‘-i hâze’l-kitâbi’l-müstetâb Fazlullah Beşe b. Receb nâm kimesne mahzarında vesâyeti hasebiyle ikrâr-ı tâm ve takrîr-i kelâm edip merkūm İstati’yi bi gayr-ı hakkın sen katl eyledin deyû dem ve diyetini mersûm Fazlullah Beşe’den bundan akdem da‘vâ ve taleb edip mezbûr Fazlullah Beşe dahi bi’l-külliye münkir olup biz dahi müdde‘âmızı isbâta kirâren ve mirâren kādir olmayıp mezbûr İstati[’yi] merkūm Fazlullah Beşe[’nin] katl eylediğini görmüş kimesne olmamağla bi’l-vesâye istihlâf eylediğimde mezbûr Fazlullah Beşe dahi yemîn etmek sadedinde iken beynimize muslihûn tavassut edip sagīrân-ı merkūmâna sulh min külli’l-vücûh enfa‘ ve evlâ olmağın husûs-ı mezbûr da‘vâsından beni on yedi bin cedîd akçe üzerine sulh eylediklerinde ben dahi vesâyet-i mahkiyem hasebiyle sulh-ı mezbûru kabûl ve bedel-i sulh olan meblağ-ı mezbûr on yedi bin akçeyi merkūm Fazlullah Beşe yedinden tamâmen ahz ü kabz edip husûs-ı mezbûra müte‘allik cemî‘ da‘vâ ve mütâlebât ve eymân ve muhâsamâtdan merkūm Fazlullah Beşe’nin zimmetini vesâyetim hasebiyle ibrâ-i âmm-ı kātı‘ü’n-nizâ[‘] ile ibrâ ve iskāt eyledim, mezbûr sagīrân-ı merkūmânın mezbûr Fazlullah Beşe ile vechen mine’l-vücûhi’ş-şer‘î da‘vâ ve nizâ‘ları kalmamışdır, sudûr dahi ederse lede’l-hükkâm-ı zevi’l-ihtirâm makbûle olmaya dedikde vasiyy-i mezbûrun minvâl-i meşrûh üzre cârî ve sâdır olan cemî‘ ikrârını merkūm Fazlullah Beşe vicâhen ve şifâhen tasdîk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min Şevvâli’l-mükerrem li sene hamsin ve sittîn ve elf. Şuhûdü’l-hâl: Ali Çelebi b. Mustafa, İbrahim Çelebi b. Ebîbekir, Hasan Beşe b. Ahmed, Bayram Beşe b. Ahmed, Mustafa Beşe b. Mehmed, Hüseyin Beşe b. Abdülbâkī