Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 135 Hüküm no: 128 Orijinal metin no: [24b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sava v. Yanko’nun Abdullah b. Mehmed’in vasîsinden aldığı borç için Yani ile Kiryako’nun kefil oldukları Havâss-ı aliyye kazâsına tâbi‘ Cuhûd Burgos demekle ma‘rûf karye sükkânından Yani v. Nikola nâm zimmî ile Kiryako bt. Panayot nâm nasrâniye meclis-i şer‘-i şerîf-i lâzımü’t-tevkīrde işbu hâmilü’l-vesîka Abdullah b. Mehmed nâm sagīrin üvey babası ve kıbel-i şer‘-i kavîmden mansûb vasîsi olan Ali Beşe [b.] Abdülmennân nâm kimesne mahzarında her biri tav‘an ikrâr-ı tâm ve ifâde-i merâm edip sagīr-i mezbûrun mâlından gāib ani’l-meclis Sava v. Yanko nâm nasrânî zimmetinde dört [25a] bin cedîd akçe asıl ve murâbaha-i şer‘iyyesinden dahi altı yüz akçe ki cem‘an dört bin altı yüz akçe olup meblağ-ı merkūma tarafeynden emr ve kabûlü hâviye kefâlet-i sahîha-i şer‘iyye ile her birimiz kefîl bi’l-mâl olduk dediklerinde mukırrân-ı mezbûrânın minvâl-i meşrûh üzre cârî ve sâdır olan ikrâr ve takrîrini vasiyy-i merkūm vicâhen ve şifâhen tasdîk ve tahkīk etmeğin mâ hüve’l-vâki‘ bi’l-ibtigā ketb olundu. Fî 21 min Şevvâli’l-mükerrem li sene 1065. Şuhûdü’l-hâl: Mehmed Efendi b. Habil el-Kadı, muharrirü’l-vesîka Mehmed Efendi el-Eyyûbî, Abdullah Beşe b. İskender, Hüseyin Çelebi b. Ali, Dilâver el-Muhzır ve gayruhüm mine’l-hâzırîn