Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 136 Hüküm no: 130 Orijinal metin no: [25a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Muhyiddin Halîfe b. İlyas’ın mülk menzilinin Habibe Hâtun bt. Abdullah’a satılması Medîne-i Ebâ Eyyûb el-Ensârî -dâme fî rıdvâni’l-Bârî-’de Câmi‘-i şerîf-i kebîr mahallesi sâkinlerinden Muhyiddin Halîfe b. İlyas tarafından bey‘-i câ’i’z-zikri ikrâra vekîl olup hasm-ı şer‘î-i câhid mahzarında Halil Çelebi [b.] Hüdâverdi ve Mustafa Çelebi b. Mehmed şehâdetleriyle şer‘an vekâleti sâbite olan fahr[ü’l-]e’imme Şaban Efendi b. Ebîbekir nâm vekîl meclis-i şer‘-i şerîf-i lâzımü’t-teşrîfde işbu hâmilü’l-vesîka Habibe bt. Abdullah nâm hâtun tarafından husûs-ı câ’i’z-zikri tasdîke vekîli olup bimâ hüve tarîkü’s-sübût şer‘an vekâlet-i sâbite olan fahrü’l-emâsil Mehmed Çelebi b. Ahmed nâm bevvâb-ı sultânî mahzarında bi’l-vekâle ikrâr ve i‘tirâf edip medîne-i merkūmede Çavuş Kasım mahallesinde vâki‘ bir tarafdan Hüseyin Efendi b. Mehmed mülkü ve bir tarafdan Hanım demekle ma‘rûf hâtun mülkü ve bir tarafdan Râzıye Hâtun ve ba‘zan Mehmed Çelebi b. Hüseyin mülkü ve bir tarafdan tarîk-i âm ile mahdûd olup dâhiliye ve hâriciyesi büyût-i adîdeyi ve üç sofayı ve hadîkayı ve kenîfi müştemil olan mülk menzilimi bi cümleti’t-tevâbi‘ ve’l-levâhık müvekkile-i merkūme Habibe Hâtu[n’a] bey‘-i kat‘î ile altmış sekiz bin cedîd akçeye bey‘ ve teslîm ol dahi minvâl-i muharrer üzre iştirâ ve tesellüm eyledikden sonra semeni olan meblağ-ı mezbûr altmış sekiz bin akçeyi müvekkil-i merkūm yedinden tamâmen ahz ü kabz eyledim ba‘de’l-yevm benim alâka ve medhalim yokdur müvekkile-i mersûmenin mülk-i müşterâsı olmuşdur keyfemâ teşâ [ve] tehtâr mutasarrıfe olsun dedikde vekîl-i mezbûr Şaban Efendi’nin minvâl-i muharrer üzre cârî ve sâdır olan cemî‘ ikrârını vekîl-i âhar mezbûr Mehmed Çelebi vicâhen tasdîk ve şifâhen tahkīk etmeğin mâ hüve’l-vâki‘ bi’l-ibtigā ketb olundu. Fi’l-yevmi’l-hâdî ve’l-ışrîn min Şevvâli’l-mükerrem min şuhûri sene hamsin ve sittîn ve elf men lehü’l-izzu ve’ş-şeref. Şuhûdü’l-hâl: Hüseyin Efendi b. Mehmed, Mehmed Çelebi b. Abdullah, Mehmed Beşe b. Ahmed, Hasan Beşe b. Abdullah, Ahmed Efendi b. Mehmed, Cafer Çelebi b. Hasan, Mustafa b. Abdullah, Ali Beşe b. Abdullah, Hüseyin Beşe b. Ali, Mustafa Beşe b. Mehmed