Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 137 Hüküm no: 132 Orijinal metin no: [25b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rabia Hâtun bt. Ali’nin zevci Mustafa b. Ahmed ile muhâlaa ile boşandıkları Mahrûse-i Galata muzâfâtından Demirci demekle ma‘rûf karye sâkinelerinden Râbia Hâtun bt. Ali meclis-i şer‘-i şerîf-i enver ve mahfil-i dîn-i münîf-i ezherde zevci işbu hâmilü’l-kitâb Mustafa b. Ahmed nâm kimesne mahzarında bi tav‘ihâ ikrâr-ı tâm ve takrîr-i kelâm edip zevcim mezbûr Mustafa ile hüsn-i zindegânem olmamağla beynimizde şikāk-ı küllî vâki‘ olmağın zimmetinde mütekarrir olan beş yüz cedîd akçe mehr-i müeccelimden geçip ve nafaka-i iddet ve me’ûnet-i süknâm kendi üzerime olmak üzre mezbûr Mustafa ile muhâla‘a-i sahîha-i şer‘iyye ile muhâla‘a eyleyip zimmetini zevciyete müte‘allik âmme-i [da‘vâdan] ibrâ-i âmm-ı kātı‘ü’n-nizâ‘la ibrâ ve iskāt eyledim dedikde merkūm Mustafa dahi minvâl-i meşrûh üzre olan hul‘ı kabûl edip ben dahi zevciyete müte‘allik cemî‘ da‘vâdan merkūm Râbia’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’l-ibtigā ketb olundu. Fi’l-yevmi’s-sânî ve’l-ışrîn min Şevvâli’l-mükerrem min şuhûri sene hamsin ve sittîn ve elf min hicreti men lehü’l-izzu ve’ş-şeref. Şuhûdü’l-hâl: Ali Beşe b. Mustafa, Hüseyin Çelebi b. Ali, Abdullah Beşe b. İskender, Dilâver Beşe b. Abdullah, Bayram Sofu b. Mehmed