Eyüb Mahkemesi (Havass-ı Refia) 61 Numaralı Sicil (H. 1065- 1066 / M. 1655) cilt: 27, sayfa: 137 Hüküm no: 133 Orijinal metin no: [25b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasap Sinan Vakfı’nın vakfiyesinde kitabet ücreti şartı bulunmadığı için Musa Halîfe’nin hasbî kâtib olduğu Havâss-ı Kostantıniyye kazâsına tâbi‘ Büyük Çekmece nâhiyesi ihtivâsından Kasab Sinan vaz‘ eylediği İkşenoz demekle ma‘rûfe karyede mezbûr Kasab Sinan binâ eylediği câmi‘-i şerîf vakfına Hidâyetullah b. Abdullah nâm kimesne yevmî üç akçe vazîfe ile kâtib olup lâkin vakfiye-i ma‘mûlün-bihâsından olmadığından mâ‘adâ vakf-ı mezbûrun müsâ‘adesi olmamağla mezbûr Hidâyetullah azl olunup hasbî kâtib olmak cânib-i vakfa min külli’l-vücûh enfa‘ ve evlâ olmağın erbâb-ı istihkākdan işbu bâ‘isü’l-vesîka Musa Halîfe b. Mehmed nâm kimesne vakf-ı mezbûra kıbel-i şer‘-i şerîfden hasbî kâtib nasb ve ta‘yîn olunup tasarrufu için bu hurûf alâ tarîki’t-temessük ketb ve sebt olunup [yed-i] tâlibe vaz‘ olundu. Fî evâhiri Şevvâli’l-mükerrem li sene hamsin ve sittîn ve elf. Şuhûdü’l-hâl: Hüseyin Beşe b. Ali, Bayram Sofu b. Mehmed, Mustafa Beşe b. Mehmed, Abdi Beşe b. İskender, Ahmed Beşe b. Hasan, Mahmud Beşe b. Receb, Dilâver Beşe b. Abdullah